P. Vergilius Maro, Aeneid 1.494-504
Tier 2
dum Aenēās videt haec mīrabilia et dum stupet, stat in ūnō locō. Dīdō, rēgīna pulcherrima, ambulat ad templum cum multīs iuvenibus.
quālis Dīāna (dum ambulat in rīpīs fluminis Eurōtae aut ambulat per viās montis Cynthī) ducit chorōs mille nymphae. Dīāna gerit pharetram umerō et, ambulāns, superēminet omnēs deās. mater Lātōna gaudet in suō tacitō pectore. talis erat Dīdō, quae ferēbat sē laeta per mediōs, īnstāns operī futūrīs rēgnīs.
Tier 3
dum haec mīranda videntur Dardaniō Aenēae, et dum stupet et, dēfixus, haeret in ūnō obtūtū, Dīdō, rēgīna, pulcherrima fōrmā, incessit ad templum magnā stīpante catervā iuvenum.
quālis Dīāna, in rīpīs Eurōtae aut per iuga Cynthī, exercet chorōs, quam mīlle secūtae hinc atque Orēades glomerantur hinc; illa fert pharetram umerō, gradiēnsque superēminet omnēs deās (gaudia pertemptant tacitum pectus Lātōnae): tālis erat Dīdō, tālem ferēbat sē laeta per mediōs, īnstāns operī futūrīs rēgnīs.
Tier 4
- haec dum Dardaniō Aenēae mīranda videntur,
- dum stupet obtūtūque haeret dēfixus in ūnō,
- rēgīna ad templum, fōrmā pulcherrima Dīdō,
- incessit, magnā iuvenum stīpante catervā.
- quālis in Eurōtae rīpīs aut per iuga Cynthī
- exercet Dīāna chorōs, quam mīlle secūtae
- hinc atque hinc glomerantur Orēades; illa pharetram
- fert umerō, gradiēnsque deās superēminet omnēs
- (Lātōnae tacitum pertemptant gaudia pectus):
- tālis erat Dīdō, tālem sē laeta ferēbat
- per mediōs, īnstāns operī rēgnīsque futūrīs.