Aenēās videt haec mīra. Aenēās stupet et stat. Aenēās haeret in ūnō aspectū.

Dīdō est rēgīna. Dīdō est pulcherrima. Dīdō ad templum venit cum magnā catervā iuvenum.

Dīāna est dea pulchra. Dīāna ambulat in rīpīs flūminis Eurōtae. Dīāna etiam ambulat in iugīs montis Cynthī. mīlle nymphae sequuntur Dīānam. Dīāna portat pharetram in umerō suō. Dīāna est altior quam omnēs aliae deae. māter Dīānae est Lātōna. Lātōna gaudet et tacet.

Dīdō est sicut Dīāna. Dīdō est laeta. Dīdō ambulat per medium populum. Dīdō labōrat. Dīdō parat futūrum rēgnum.

dum Aenēās videt haec mīrabilia et dum stupet, haeret in ūnō aspectū. Dīdō, rēgīna pulcherrima, incēdit ad templum cum magnā catervā iuvenum.

quālis Dīāna in rīpīs flūminis Eurōtae aut in iugīs montis Cynthī ducit chorōs, mīlle nymphae Dīānam sequuntur. Dīāna gerit pharetram umerō et, gradiēns, superēminet omnēs deās; māter Lātōna gaudet in tacitō pectore: tālis erat Dīdō, quae ferēbat sē laeta per mediōs virōs, īnstāns operī et futūrō rēgnō.

dum haec mīranda videntur Dardaniō Aenēae, et dum stupet et, dēfixus, haeret in ūnō obtūtū, Dīdō, rēgīna, pulcherrima fōrmā, incessit ad templum magnā stīpante catervā iuvenum.

quālis Dīāna, in rīpīs Eurōtae aut per iuga Cynthī, exercet chorōs, quam mīlle secūtae hinc atque Orēades glomerantur hinc; illa fert pharetram umerō, gradiēnsque superēminet omnēs deās (gaudia pertemptant tacitum pectus Lātōnae): tālis erat Dīdō, tālem ferēbat sē laeta per mediōs, īnstāns operī futūrīs rēgnīs.

494. haec dum Dardaniō Aenēae mīranda videntur,
495. dum stupet obtūtūque haeret dēfixus in ūnō,
496. rēgīna ad templum, fōrmā pulcherrima Dīdō,
497. incessit, magnā iuvenum stīpante catervā.
498. quālis in Eurōtae rīpīs aut per iuga Cynthī
499. exercet Dīāna chorōs, quam mīlle secūtae
500. hinc atque hinc glomerantur Orēades; illa pharetram
501. fert umerō, gradiēnsque deās superēminet omnēs
502. (Lātōnae tacitum pertemptant gaudia pectus):
503. tālis erat Dīdō, tālem sē laeta ferēbat
504. per mediōs, īnstāns operī rēgnīsque futūrīs.