Platō librum "dē Rē Pūblicā" scrīpsit. post multōs annōs Cicerō quoque librum "dē Rē Pūblicā" scrīpsit. hunc librum annō 700 AUC (54 BCE) scrībere coepit. in fīne librī Cicerō fābulam dē somniō nārrat.

annō 605 AUC (149 BCE) Pūblius Scīpiō iuvenis in Āfricā erat. ad Masinissam, rēgem amīcum, vēnit, et diū cum rēge dē avō suō dīcēbat. avus erat Scīpiō Āfricānus, dux clārus, quī Hannibalem vīcit.

tum Scīpiō dormīvit, et in somnō avum vīdit. Āfricānus nepōtem in caelum dūxit. mox Scīpiō in locō altō inter stellās stābat. ibi stellās vīdit quās hominēs ē terrā vidēre nōn possunt. stellae magnae erant, multō maiōrēs quam terra.

deinde Scīpiō dē caelō ad terram spectāvit. terra parva erat. Scīpiō imperium Rōmānum in terrā vix vidēre poterat, et trīstis erat, quod imperium tam parvum erat.

Āfricānus nepōtem spectāvit. "vidēs terram," inquit. "parva est. fāma hominum nōn longē it, et nōn diū manet. multae gentēs nōmen Rōmānum numquam audīvērunt. nōlī glōriam in terrā quaerere. spectā caelum. virtūs ipsa tē ad vēram glōriam dūcit."