Igitur boni mores colebantur domi et in bello; erat maxima concordia, et minima avaritia; ius et probitas valebant apud Romanos, non quia leges habebant, sed e natura.

Romani exercebant pugnas, discordias, inimicitias cum hostibus. Cives certabant cum civibus de virtute. Romani erant magnifici in suppliciis deorum, parci domi, et fideles in amicos.

Romani curabant et se et rem publicam duabus his artibus, audacia in bello et aequitate cum pax venerat.

Quarum rerum, ego habeo haec documenta maxima, quia saepius punitus est in bello is qui contra hostes pugnaverat sine imperio, et qui, revocatus a proelio, tardius revenerat, sed non tam saepe punitus est is qui ausus erat signa relinquere aut, pulsus e loco, cedere;

Sed in pace, quia Romani imperabant magis beneficiis quam metu et accepta iniuria, Romani malebant ignoscere quam punire.

Igitur boni mores domi militiaeque colebantur; concordia maxima, minima avaritia erat; ius bonumque valebat apud eos non magis legibus, quam natura.

Exercebant iurgia, discordias, simultates cum hostibus, cives certabant cum civibus de virtute. Erant magnifici in suppliciis deorum, parci domi, fideles in amicos.

Curabant seque remque publicam duabus his artibus, audacia in bello, aequitate ubi pax evenerat.

Quarum rerum, ego habeo haec documenta maxima, quod saepius vindicatum est in eos in bello qui pugnaverant in hostem contra imperium, quique revocati proelio tardius excesserant, quam qui ausi erant signa relinquere aut cedere pulsi loco;

in pace vero, quod agitabant imperium magis beneficiis quam metu et accepta iniuria malebant ignoscere quam persequi.

Igitur domi militiaeque

boni mores colebantur;

concordia maxuma,

minuma avaritia erat;

ius bonumque

apud eos

non legibus magis quam natura

valebat.

Iurgia, discordias, simultates

cum hostibus exercebant,

cives cum civibus

de virtute

certabant.

In suppliciis deorum

magnifici,

domi parci,

in amicos fideles erant.

Duabus his artibus,

audacia in bello,

ubi pax evenerat, aequitate,

seque remque publicam curabant.

Quarum rerum

ego maxuma documenta haec habeo,

quod in bello

saepius vindicatum est

in eos,

qui contra imperium in hostem pugnaverant

quique tardius revocati proelio excesserant,

quam

qui signa relinquere

aut pulsi loco

cedere ausi erant;

in pace vero,

quod beneficiis

magis quam metu

imperium agitabant

et accepta iniuria

ignoscere quam persequi malebant.

Igitur domi militiaeque boni mores colebantur; concordia maxuma, minuma avaritia erat; ius bonumque apud eos non legibus magis quam natura valebat. Iurgia, discordias, simultates cum hostibus exercebant, cives cum civibus de virtute certabant. In suppliciis deorum magnifici, domi parci, in amicos fideles erant. Duabus his artibus, audacia in bello, ubi pax evenerat, aequitate, seque remque publicam curabant. Quarum rerum ego maxuma documenta haec habeo, quod in bello saepius vindicatum est in eos, qui contra imperium in hostem pugnaverant quique tardius revocati proelio excesserant, quam qui signa relinquere aut pulsi loco cedere ausi erant; in pace vero, quod beneficiis magis quam metu imperium agitabant et accepta iniuria ignoscere quam persequi malebant.