P. Ovidius Naso, Metamorphoses 8.223–235
The episode reaches its turn, and the focus narrows to the boy alone, then to the father's search. The Latin closes with two aetiologies, the naming of the Icarian Sea and of the island Icaria.
Tier 1
subitō puer audācī volātū gaudēre coepit. patrem suum dēseruit. caelum cupiēbat. itaque altius volāvit. sed sōl prope erat. sōl cēram molliēbat. cēra dēfluxit. Īcarus pennās nōn iam habēbat. sē movēbat, sed volāre nōn poterat. āer eum nōn portābat. Īcarus patrem clāmāvit. tum in mare caeruleum cecidit. mare nōmen ab Īcarō trāxit.
at Daedalus pater īnfēlīx erat. nōn iam pater erat. 'Īcare,' dīxit. 'Īcare,' dīxit, 'ubi es? in quā regiōne tē quaeram?' 'Īcare,' dīcēbat. tum pennās in undīs vīdit. artēs suās ōdit. corpus fīliī in sepulcrō posuit. terra quoque nōmen ab Īcarō trāxit.
Tier 2
tum subitō puer audācī volātū gaudēre coepit, et ducem dēseruit, et caelī cupīdine tractus altius volāvit. sōl rapidus prope erat et cēram, quae erat vinculum pennārum, molliēbat. cērae liquefactae erant: nūdōs lacertōs Īcarus movet, sed ālīs carēns nōn ūllās aurās percipit. ōra patrium nōmen clāmantia caeruleā aquā excipiuntur. mare nōmen ab Īcarō trāxit.
at pater īnfēlīx, nec iam pater, 'Īcare,' dīxit, 'Īcare,' dīxit, 'ubi es? in quā regiōne tē requīram?' 'Īcare,' dīcēbat. tum pennās in undīs aspexit, et artēs suās dēvōvit, et corpus fīliī in sepulcrō condidit. terra quoque ā nōmine sepultī dicta est.
Tier 3
[tum] cum puer audācī volātū gaudēre coepit dēseruitque ducem, et caelī cupīdine tractus altius iter ēgit. rapidī sōlis vīcīnia odōrātās cērās, [quae erant] pennārum vincula, mollit; cērae tābuerant: ille nūdōs lacertōs quatit, et rēmigiō carēns nōn ūllās aurās percipit. ōraque, patrium nōmen clāmantia, caeruleā aquā excipiuntur, quae nōmen ab illō trāxit.
at pater īnfēlīx, nec iam pater, 'Īcare,' dīxit, 'Īcare,' dīxit, 'ubi es? quā tē regiōne requīram?' 'Īcare,' dīcēbat: pennās in undīs aspexit, dēvōvitque suās artēs, corpusque sepulcrō condidit, et tellūs ā nōmine sepultī [Īcaria] dicta [est].
Tier 4 - Carmen Ipsum
- cum puer audācī coepit gaudēre volātū
- dēseruitque ducem caelīque cupīdine tractus
- altius ēgit iter. rapidī vīcīnia sōlis
- mollit odōrātās, pennārum vincula, cērās;
- tābuerant cērae: nūdōs quatit ille lacertōs,
- rēmigiōque carēns nōn ūllās percipit aurās,
- ōraque caeruleā patrium clāmantia nōmen
- excipiuntur aquā, quae nōmen trāxit ab illō.
- at pater īnfēlīx, nec iam pater, 'Īcare,' dīxit,
- 'Īcare,' dīxit 'ubi es? quā tē regiōne requīram?'
- 'Īcare' dīcēbat: pennās aspexit in undīs
- dēvōvitque suās artēs corpusque sepulcrō
- condidit, et tellūs ā nōmine dictā sepultī.
