P. Ovidius Naso, Metamorphoses 1.512–524
Apollo's appeal continues, turning into a self-introduction. He names the cult-places sacred to him, Delphi, Claros, Tenedos, and Patara, along with his father Jupiter.
Tier 1
Apollō addidit: 'tū dēbēs scīre: ego tē amō! nōn habitō in monte sōlus. nōn sum pastor. nōn cūrō armenta et gregēs hīc, sordidus. temerāria es, Daphnē! nescis! ego sum magnus deus. ideō fugis.
Delphī, Clarus, Tenedos, et Patara mihi serviunt. Iuppiter est pater meus. per mē hominēs sciunt rēs futūrās, rēs praeteritās, et rēs praesentēs. per mē carmina pulchra fīunt.
sagitta mea certa est, sed sagitta Cupīdinis certior est. illa sagitta vulnera in pectore meō fēcit. anteā pectus meum vacuum erat. ego medicīnam invēnī. omnēs hominēs in mundō mē "opiferum" vocant, quod auxilium ferō. potentia herbārum mihi servit. heu mē! amōrem herbīs sānāre nōn possum. artēs meae omnibus prōsunt, sed mihi, dominō, nōn prōsunt!'
Tier 2
Apollō addit: 'tamen inquīre: "cui placeō?" nōn sum incola montis, nōn ego sum pastor, nōn hīc horridus observō armenta gregēsque. nescis, temerāria, nescis quem fugis, ideōque fugis.
mihi tellūs Delphica et Clarus et Tenedos Patarēaque rēgia servit; Iuppiter est genitor; per mē patet quod eritque, fuitque, estque; per mē carmina concordant nervīs.
nostra sagitta quidem certa est, tamen ūna sagitta certior est nostrā, quae vulnera fēcit in pectore vacuō! medicīna inventum meum est, et per orbem dīcor opifer, et potentia herbārum subiecta est nōbīs. eī mihi! amōrem nūllae herbae sānāre possunt, nec artēs, quae omnibus prōsunt, dominō prōsunt!'
Tier 3
[Apollō pergit:] 'cui placeās tamen inquīre: nōn [sum] incola montis, nōn ego sum pastor, nōn hīc horridus observō armenta gregēsque. nescis, temerāria, nescis quem fugiās, ideōque fugis: mihi Delphica tellūs et Clarus et Tenedos Patarēaque rēgia servit; Iuppiter est genitor; per mē patet [id] quod eritque fuitque estque; per mē carmina concordant nervīs. nostra [sagitta] quidem certa est, [sed] tamen ūna sagitta nostrā certior, quae vulnera fēcit in pectore vacuō! medicīna est inventum meum, et per orbem dīcor opifer, et potentia herbārum subiecta [est] nōbīs. eī mihi, quod amor nūllīs herbīs sānābilis est, nec artēs, quae omnibus prōsunt, dominō [suō] prōsunt!'
Tier 4 - Carmen Ipsum
- cui placeās, inquīre tamen: nōn incola montis,
- nōn ego sum pastor, nōn hīc armenta gregēsque
- horridus observō. nescis, temerāria, nescis,
- quem fugiās, ideōque fugis: mihi Delphica tellūs
- et Clarus et Tenedos Patarēaque rēgia servit;
- Iuppiter est genitor; per mē, quod eritque fuitque
- estque, patet; per mē concordant carmina nervīs.
- certa quidem nostra est, nostra tamen ūna sagitta
- certior, in vacuō quae vulnera pectore fēcit!
- inventum medicīna meum est, opiferque per orbem
- dīcor, et herbārum subiecta potentia nōbīs.
- eī mihi, quod nūllīs amor est sānābilis herbīs
- nec prōsunt dominō, quae prōsunt omnibus, artēs!'
