P. Vergilius Maro, Aeneid 7.803–817
Camilla, a warrior maiden of Volscian origin, arrives to aid Turnus in his war against Aeneas. She captivates the crowd with her beauty and martial prowess, representing a figure of exceptional courage and supernatural speed.
Tier 1
post omnēs aliōs ducēs, ultima advēnit Camilla, dē gente Volscā. agmen equitum dūcēbat et multās cōpiās armātās.
aliae fēminae lānam faciēbant et domī manēbant. Camilla nōn ita erat. Camilla bellatīx erat; proelia dūra patiēbātur et cursū ventōs superābat.
tam vēlōx erat ut per summās herbās currere posset, nec tenerās spīcās laederet. tam vēlōx erat ut per medium mare currere posset, nec pedēs suōs madidōs faceret.
omnēs iuvenēs ex domibus agrīsque vēnerunt. eam vidēre volēbant. mātrēs quoque cucurrērunt. omnēs Camillam spectābant. ōra eōrum aperta erant; attonitī erant.
quid vidēbant? purpuram rēgiam in umerīs levibus gerēbat. fibula aurea comam tenēbat. pharetram Lyciam portābat. et hastam portābat. hasta ex myrtō facta est et cuspidem ācrem habēbat.
Tier 2
Camilla dē gente Volscā hīs super advēnit; agmen equitum dūcēbat et catervās armātās. bellatrīx erat. nōn solēbat manibus opus fēmineum facere, sed virgō solēbat dūra proelia patī et cursū pedum ventōs superāre.
illa vel per summās herbās intāctae segetis volāret nec tenerās spīcās cursū laederet, vel per medium mare super undās suspēnsa iter ferret nec pedēs madidōs faceret.
illam omnis iuventūs tēctīs agrīsque effūsa turbaque mātrum mīrābātur et euntem prōspectābat, ut purpura rēgia levīs umerōs velāret, ut aurea fibula comam tenēret, ut ipsa Lyciam pharetram gereret et hastam myrtō ōrnātam cum cuspide ācrī.
Tier 3
Camilla dē gente Volscā hīs super advēnit, agmen equitum agēns et catervās flōrentīs aere; bellatrīx, nōn illa fēmineās manūs colō calathīsve Minervae adsuēta, sed [illa] virgō proelia dūra patī cursūque pedum ventōs praevertere [adsuēta].
illa vel per summa grāmina intāctae segetis volāret nec tenerās aristās cursū laedisset, vel [iter] per medium mare fluctū tumentī suspēnsa ferret celerīs nec plantās aequore tingeret.
illam omnis iuventūs tēctīs agrīsque effūsa turbaque mātrum mīrātur et euntem prōspectat, attonitīs animīs inhiāns ut rēgius honōs levīs umerōs ostrō velet, ut fibula crīnem aurō internectat, ut [Camilla] ipsa Lyciam pharetram gerat et pastōrālem myrtum praefīxā cuspide.
Tier 4 - Carmen Ipsum
- hōs super advēnit Volscā dē gente Camilla
- agmen agēns equitum et flōrentīs aere catervās,
- bellatrīx, nōn illa colō calathīsve Minervae
- fēmineās adsuēta manūs, sed proelia virgō
- dūra patī cursūque pedum praevertere ventōs.
- illa vel intāctae segetis per summa volāret
- grāmina nec tenerās cursū laedisset aristās,
- vel mare per medium fluctū suspēnsa tumentī
- ferret iter celerīs nec tingeret aequore plantās.
- illam omnis tēctīs agrīsque effūsa iuventūs
- turbaque mīrātur mātrum et prōspectat euntem,
- attonitīs inhiāns animīs ut rēgius ostrō
- velet honōs levīs umerōs, ut fibula crīnem
- aurō internectat, Lyciam ut gerat ipsa pharetram
- et pastōrālem praefīxā cuspide myrtum.
Tier 4 - Carmen Ipsum (AP Core Vocabulary)
- hōs super advēnit Volscā dē gente Camilla
- agmen agēns equitum et flōrentīs aere catervās,
- bellatrīx, nōn illa colō calathīsve Minervae
- fēmineās adsuēta manūs, sed proelia virgō
- dūra patī cursūque pedum praevertere ventōs.
- illa vel intāctae segetis per summa volāret
- grāmina nec tenerās cursū laedisset aristās,
- vel mare per medium fluctū suspēnsa tumentī
- ferret iter celerīs nec tingeret aequore plantās.
- illam omnis tēctīs agrīsque effūsa iuventūs
- turbaque mīrātur mātrum et prōspectat euntem,
- attonitīs inhiāns animīs ut rēgius ostrō
- velet honōs levīs umerōs, ut fibula crīnem
- aurō internectat, Lyciam ut gerat ipsa pharetram
- et pastōrālem praefīxā cuspide myrtum.
