C. Valerius Catullus, Carmen 64.188–201
Ariadne's speech reaches its climax. She turns from human helplessness to the divine, calling upon the Eumenides as the close of her long lament.
Tier 1
"ego morī parāta sum. sed prius hoc faciam: ā deīs poenam iūstam petam. Thēseus mē prōdidit. ego deōs caelī in extrēmā hōrā vocābō.
vōs, Eumenidēs, dīvae sevērae! vōs virōs malōs perditis. vōs serpentēs in capite habētis. vōs īrās in pectore habētis. hūc venīte! audīte verba mea!
vae mihi miserae! ego haec verba ē tōtō corde meō dīcere cōgor. ego sōla sum. ego ārdeō. furor mē caecam facit.
haec verba vēra sunt. haec verba ē corde meō veniunt. vōs nōlīte sinere dolōrem meum frustrā esse.
Thēseus mē sōlam reliquit. tālī mente nunc sē et suōs perdat!"
Tier 2
"sed nōn ante moriar, neque sēnsūs ē fessō corpore meō exībunt, priusquam ā deīs iūstam poenam petam, prōdita, et caelestēs in extrēmā hōrā precer.
quārē, Eumenidēs, quae virōrum facta iūstā poenā pūnītis, quibus serpentēs prō capillīs sunt, et quārum frōns īrās pectoris ostendit: hūc venīte! audīte verba mea!
quae verba ego, vae miserae, ē tōtō pectore meō dīcere cōgor, sōla, ārdēns, furōre caeca.
haec verba vēra sunt; ex īmō pectore meō nāscuntur. vōs nōlīte sinere dolōrem meum frustrā esse.
sed quālī mente Thēseus mē sōlam relīquit, tālī mente, deae, sē suōsque perdat!"
Tier 3
"nōn tamen ante lūmina mihi morte languēscent, nec prius sēnsūs ā fessō corpore sēcēdent, quam iūstam multam ā dīvīs exposcam, prōdita, postrēmā hōrā caelestum fidem comprecer.
quārē, Eumenidēs, vindice poenā multantēs facta virum, quibus frōns, anguīnō capillō redimīta, exspīrantis pectoris īrās praeportat, hūc, hūc adventāte, audīte querellās meās, quās ego, vae miserae, extrēmīs medullīs prōferre cōgor, inops, ārdēns, āmentī furōre caeca. quae quoniam vērae ab īmō pectore nāscuntur, vōs nōlīte patī lūctum nostrum vānēscere;
sed quālī mente Thēseus mē sōlam relīquit, tālī mente, deae, sēque suōsque fūnestet."
Tier 4 - Carmen Ipsum
- "nōn tamen ante mihi languēscent lūmina morte,
- nec prius ā fessō sēcēdent corpore sēnsūs,
- quam iūstam ā dīvīs exposcam prōdita multam
- caelestumque fidem postrēmā comprecer hōrā.
- quārē facta virum multantēs vindice poenā
- Eumenidēs, quibus anguīnō redimīta capillō
- frōns exspīrantis praeportat pectoris īrās,
- hūc hūc adventāte, meās audīte querellās,
- quās ego, vae, miserae extrēmīs prōferre medullīs
- cōgor inops, ārdēns, āmentī caeca furōre.
- quae quoniam vērae nāscuntur pectore ab īmō,
- vōs nōlīte patī nostrum vānēscere lūctum,
- sed quālī sōlam Thēseus mē mente relīquit,
- tālī mente, deae, fūnestet sēque suōsque."
Original draft written by Robert Amstutz
