C. Valerius Catullus, Carmen 64.177–187
Ariadne's speech takes stock of her situation. She runs through the possibilities open to her — the mountains of Ida, her father, her husband — and weighs each in turn.
Tier 1
"quō nunc ībō? quam spem habeō? nūllam habeō.
nōn possum ad montēs Crētae redīre. mare māgnum mē ā Crētā dīvidit.
nōn possum ad patrem redīre auxilium petītum. ego patrem reliquī. ego iuvenem secūta sum, quī frātrem meum interfēcerat.
nōn possum ā marītō auxilium petere. Thēseus iam fugit. Thēseus rēmōs in marī movet.
īnsula est sōla. nēmō hīc habitat. nūlla domus est. nūlla via patet. mare circum īnsulam est.
nūlla via fugae est. nūlla spēs est. omnia tacent. omnia dēserta sunt. omnia mortem ostendunt."
Tier 2
"nam quō mē referam? quam spem nunc habeō, perdita?
montēsne Crētae petam? at lātum mare crūdēlī aequore mē ā Crētā dīvidit.
an patris auxilium spērem? quem ipsa relīquī, iuvenem frāternā caede sparsum secūta!
an in fīdō coniugis amōre spem habeam? at coniūnx ipse iam fugit, rēmōs in altō marī movēns!
praetereā sōla īnsula nūllō tēctō colitur, nec ūlla via mihi patet, mare undīs cingentibus.
nūlla fugae ratiō, nūlla spēs! omnia tacent. omnia dēserta sunt. omnia mihi mortem ostendunt."
Tier 3
"nam quō mē referam? quālī spē perdita nītor?
Īdaeōsne petam montēs? at pontus, lātō gurgite truculentum aequor discernēns, mē dīvidit.
an patris auxilium spērem? quemne ipsa relīquī, iuvenem, frāternā caede respersum, secūta?
an mēmet cōnsōler fīdō amōre coniugis? quīne fugit, lentōs rēmōs gurgite incurvāns?
praetereā sōla īnsula nūllō tēctō colitur, nec ēgressus patet, undīs pelagī cingentibus.
nūlla fugae ratiō, nūlla spēs: omnia mūta, omnia dēserta sunt, omnia lētum ostentant."
Tier 4 - Carmen Ipsum
- "nam quō mē referam? quālī spē perdita nītor?
- Īdaeōsne petam montēs? at gurgite lātō
- discernēns pontī truculentum dīvidit aequor.
- an patris auxilium spērem? quemne ipsa relīquī
- respersum iuvenem frāternā caede secūta?
- coniugis an fīdō cōnsōler mēmet amōre?
- quīne fugit lentōs incurvāns gurgite rēmōs?
- praetereā nūllō colitur sōla īnsula tēctō,
- nec patet ēgressus pelagī cingentibus undīs:
- nūlla fugae ratiō, nūlla spēs: omnia mūta,
- omnia sunt dēserta, ostentant omnia lētum."
Original draft written by Robert Amstutz
