C. Valerius Catullus, Carmen 64.50–57
At the wedding of Peleus and Thetis, the narrator's attention turns to an embroidered coverlet draped on the marriage couch. Its scenes depict heroic figures of the past, and the first to come into focus is Ariadne on the shore of Dia.
Tier 1
in lectō est vestis pulchra. haec vestis figūrās hominum antīquōrum habet. figūrae virtūtēs hērōum mīrā arte indicant.
in vestis figūrīs, Ariadna stat in lītore īnsulae Diae. Ariadna spectat mare. videt Thēseum cēdentem cum rapidīs nāvibus. Ariadna magnōs furōrēs in corde habet.
Ariadna nōndum crēdit sē vidēre ea quae videt. nam Ariadna modo ex somnō fallācī excitāta est. nunc videt: sōla et misera in harēnā est. Thēseus eam relīquit.
Tier 2
haec vestis, antīquīs figūrīs hominum variāta, virtūtēs hērōum mīrā arte indicat.
namque Ariadna, prōspectāns sonantī lītore Diae, spectat Thēseum cēdentem cum celerī classe, et indomitōs furōrēs in corde gerit.
necdum etiam crēdit sē vidēre ea quae videt, quod tunc prīmum ē fallācī somnō excitāta sē miseram in sōlā harēnā dēsertam videt.
Tier 3
haec vestis, variāta prīscīs figūrīs hominum, indicat virtūtēs hērōum mīrā arte.
namque Ariadna, prōspectāns fluentisonō lītore Diae, tuētur Thēsea cēdentem celerī cum classe, gerēns indomitōs furōrēs in corde, necdum etiam crēdit sēsē vīsere quae vīsit, utpote quae, tunc prīmum excita fallācī somnō, miseram sē dēsertam in sōlā harēnā cernat.
Tier 4 - Carmen Ipsum
- haec vestis prīscīs hominum variāta figūrīs
- hērōum mīrā virtūtēs indicat arte.
- namque fluentisonō prōspectāns lītore Diae
- Thēsea cēdentem celerī cum classe tuētur
- indomitōs in corde gerēns Ariadna furōrēs,
- necdum etiam sēsē quae vīsit vīsere crēdit,
- utpote fallācī quae tunc prīmum excita somnō
- dēsertam in sōlā miseram sē cernat harēnā.
Original draft written by Robert Amstutz
