P. Vergilius Maro, Aeneid 1.505-519
Tier 2
tum, prope iānuās templī dīvae, sub mediā testūdine templī, cum virīs armātīs, Dīdō altē sēdit in soliō. rēgīna dabat iūra lēgēsque virīs et dividēbat labōrem aequē aut sorte.
subito Aenēās videt Antheam et Sergestum et fortem Cloanthum et aliōs Trōiānōs. ātra tempestās dispulerat aequore et miserat ad aliās ōrās. nunc illī appropinquābant in turbā.
Aenēas erat stupefactus. Achātēs erat stupefactus et laetitiā et metū. volēbant coniungere dextrās manūs sociōrum sed timēbant periculum.
ambo virī erant adhūc absconditī in nube et spectābant sociōs. volēbant rogāre quae esset fortūna virīs, quō lītore relinquant navēs, quid veniant. virī lectī ībant ā navibus et nunc petēbant templum.
Tier 3
tum, foribus dīvae, mediā testūdine templī, saepta armīs, altē resēdit subnīxa soliō. dabat iūra lēgēsque virīs, et aequābat labōrem operum partibus aut trahēbat sorte -- cum subitō Aenēās videt Anthea et Sergestum et fortem Cloanthum accēdere magnō concursū, et aliōs Teucrōrum, quōs āter turbō dispulerat aequore et āvexerat penitus aliās ōrās.
simul Aenēās ipse ostipuit, simul Achātēs percussus est et laetitiā et metū; avidī ārdēbant coniungere dextrās manūs, sed incognita rēs turbat animōs.
dissimulant et (amictī cavā nūbe) speculantur, quae fortūna virīs, quō lītore linquant classem, quid veniant; nam cūnctīs nāvibus lēctī ībant, ōrantēs veniam, et petēbant templum clāmōre.
Tier 4
- tum foribus dīvae, mediā testūdine templī,
- saepta armīs, soliōque alte subnīxa resēdit.
- iūra dabat lēgēsque virīs, operumque labōrem
- partibus aequābat iūstīs aut sorte trahēbat --
- cum subitō Aenēās concursū accēdere magnō
- Anthea Sergestumque videt fortemque Cloanthum,
- Teucrōrumque aliōs, āter quōs aequore turbō
- dispulerat penitusque aliās āvexerat ōrās.
- obstipuit simul ipse, simul percussus Achātēs
- laetitiāque metūque; avidī coniungere dextrās
- ārdēbant, sed rēs animōs incognita turbat.
- dissimulant et nūbe cavā speculantur amictī,
- quae fortūna virīs, classem quō lītore linquant,
- quid veniant; cūnctīs nam lēctī nāvibus ībant,
- ōrantēs veniam, et templum clāmōre petēbant.
