Lūcius Cornēlius Sulla ex familiā patriciā Cornēliā vēnit, sed familia eius pauper erat. Sulla iuvenis cum āctōribus et poētīs vīvēbat, et multōs annōs nihil in rē pūblicā agēbat.

annō 647 AUC (107 BCE) Sulla quaestor Mariī in Āfricā erat. annō 649 AUC (105 BCE) Bocchus, rēx Maurōrum, Iugurtham ad Sullam trādidit. Marius triumphum ēgit, sed Sulla dīcēbat: "ego Iugurtham cēpī, nōn Marius." ex illō tempore Marius et Sulla inimīcī erant.

annō 666 AUC (88 BCE) Sulla cōnsul erat. Mithridātēs, rēx Pontī, multa mīlia Rōmānōrum in Asiā necāverat, et senātus Sullae bellum contrā Mithridātem dedit. sed tribūnus Sulpicius populum rogāvit, et populus illud bellum Mariō dedit. tum Sulla ad exercitum suum iit, et cum sex legiōnibus Rōmam vēnit. prīmus omnium Rōmānōrum Sulla cum exercitū Rōmānō urbem Rōmam cēpit.

Sulla deinde in Orientem iit et contrā Mithridātem pugnāvit. annō 671 AUC (83 BCE) cum exercitū iterum in Ītaliam vēnit, et bellum cīvīle contrā amīcōs Mariī gessit. annō 672 AUC (82 BCE) ad portam Collīnam vīcit, et iterum Rōmam cēpit.

Rōmānī Sullam dictātōrem fēcērunt. Sulla tabulās in forō posuit, et in tabulīs erant nōmina inimīcōrum suōrum. sī quis hominem in tabulā necābat, praemium accipiēbat, et Sulla pecūniam et agrōs eius capiēbat. multa mīlia cīvium periērunt. deinde Sulla lēgēs novās fēcit: senātum fortiōrem fēcit, et tribūnōs īnfirmiōrēs.

annō 675 AUC (79 BCE) Sulla dictātūram dēposuit et in vīllam suam in Campāniā iit. annō 676 AUC (78 BCE) periit. Sulla sē "Fēlīcem" vocābat. in sepulcrō eius haec verba erant: "nūllus amīcus mihi bene fēcit, nūllus hostis male, cui ego nōn plūs reddidī."