Carthāgō urbs māgna et potēns in Āfricā erat. Carthāginiēnsēs multās nāvēs habēbant et mare regēbant. mercātōrēs Carthāginiēnsēs ad multās terrās nāvigābant. Carthāginiēnsēs quoque māgnam partem Siciliae tenēbant.

eō tempore Rōmānī tōtam Italiam iam regēbant, sed nūllās terrās extrā Italiam habēbant. Rōmānī paucās nāvēs habēbant, quod bellum in marī numquam gesserant.

annō 490 AUC (264 BCE), Mamertīnī, mīlitēs ex Italiā quī oppidum Messānam in Siciliā cēperant, auxilium et ā Carthāginiēnsibus et ā Rōmānīs petīvērunt. Hierō enim, rēx Syrācūsārum, contrā eōs bellum gerēbat. Carthāginiēnsēs prīmī praesidium Messānam mīsērunt.

senātōrēs Rōmānī dē hāc rē diū certāvērunt. multī Messānam dēfendere nōlēbant, quod Mamertīnī oppidum iniūstē cēperant. aliī autem timēbant: sī Carthāginiēnsēs tōtam Siciliam tenēbant, Carthāginiēnsēs Italiae perīculō erant. populus Rōmānus tandem bellum voluit.

cōnsul Appius Claudius cum legiōnibus in Siciliam trānsiit. hoc prīmum bellum inter Rōmānōs et Carthāginiēnsēs erat. Rōmānī id "bellum Pūnicum" vocāvērunt. hoc bellum longum et crūdēle fuit, et per vīgintī trēs annōs durāvit.