P. Vergilius Maro, Aeneid 1.418-440
Tier 3
intereā, corripuērunt viam, quā sēmita mōnstrat. iamque ascendēbant collem, quī imminet plūrimus urbī et dēsuper adspectat adversās arcēs. Aenēās mīrātur mōlem, quondam māgālia; mīrātur portās strepitumque et strāta viārum.
Tyriī instant ārdentēs: pars dūcere mūrōs, mōlīrīque arcem et subvolvere saxa manibus, pars optāre locum tēctō et conclūdere sulcō; legunt iūra magistrātūsque sānctumque senātum.
hīc aliī effodiunt portūs; hīc aliī locant alta fundāmenta theātrī, et excīdunt immānēs columnās ē rūpibus, alta decora futūrīs scaenīs.
labor, quālis apēs aestāte novā, per rūra flōrea, exercet sub sōle, cum ēdūcunt fētūs gentis, adultōs, aut cum stīpant līquentia mella et distendunt cellās dulcī nectare, aut accipiunt onera venientum, aut (agmine factō) arcent fūcōs (ignāvum pecus) ā praesēpibus; opus fervet, et fragrantia mella redolent thymō.
“ō fortūnātī, quōrum moenia iam surgunt!” Aenēās ait et suspicit fastīgia urbis. saeptus nebulā, īnfert sē (mīrābile dictū) per mediōs, et miscet virīs neque cernitur ūllī.
Tier 4
- corripuēre viam intereā, quā sēmita mōnstrat.
- iamque ascendēbant collem, quī plūrimus urbī
- imminet adversāsque adspectat dēsuper arcēs.
- mīrātur mōlem Aenēās, māgālia quondam,
- mīrātur portās strepitumque et strāta viārum.
- vīnstant ārdentēs Tyriī: pars dūcere mūrōs,
- mōlīrīque arcem et manibus subvolvere saxa,
- pars optāre locum tēctō et conclūdere sulcō;
- iūra magistrātūsque legunt sānctumque senātum.
- hīc portūs aliī effodiunt; hīc alta theātrī
- fundāmenta locant aliī, immānēsque columnās
- rūpibus excīdunt, scaenīs decora alta futūrīs:
- quālis apēs aestāte novā per flōrea rūra
- exercet sub sōle labor, cum gentis adultōs
- ēdūcunt fētūs, aut cum līquentia mella
- stīpant et dulcī distendunt nectare cellās,
- aut onera accipiunt venientum, aut agmine factō
- ignāvum fūcōs pecus ā praesēpibus arcent;
- fervet opus, redolentque thymō fragrantia mella.
- 'ō fortūnātī, quōrum iam moenia surgunt!'
- Aenēās ait et fastīgia suspicit urbis.
- īnfert sē saeptus nebulā (mīrābile dictū)
- per mediōs, miscetque virīs neque cernitur ūllī.
P. Vergilius Maro, Aeneid 1.157-179
Tier 2
sociī Aenēae erant dēfessī. contendunt petere lītora quae erant proxima. itaque sē vertērunt ad Libyam. est portus nāturālis in hōc locō. omnis unda frangitur ā saxīs.
circum īnsulam sunt vastae rūpēs et geminī scopulī surgunt in caelum. quoque est ātra silva dēsuper. sub fronte est antrum pendentibus saxīs et sellīs nāturālibus. est domus Nymphārum.
hīc nulla nāvis demittit ancoram. hūc Aenēās, cum septem nāvibus collēctīs ex classe, īit. ac magnō amōre terrae, Trōiānī ēgrediuntur et capiunt harēnā, et pōnunt membra in lītore.
ac prīmum Archātēs, socius Aenēās, facit ignem foliīs. tum Trōiānī capiunt Cererem corruptam et īnstrūmenta, parant torrēre frumentum receptum flammīs et frangere saxō.
Tier 3
dēfessī Aeneadae, contendunt petere cursū lītora quae proxima et vertuntur ad ōrās Libyae. est locus in sēcessū longō: īnsula efficit portum obiectū laterum, quibus omnis unda ab altō frangitur et unda scindit sēsē reductōs in sinūs.
hinc atque hinc sunt vāstae rūpēs et geminī scopulī minantur in caelum, quōrum sub vertica lātē aequora sunt tūta et silent; tum est scaena coruscīs silvīs dēsuper et ātrum nemus imminet horrentī umbrā. sub fronte est antrum pendentibus scopulīs; intus sunt aquae dulcēs et sedīlia vīvō saxō, domus Nymphārum.
hīc ūlla vincula nōn tenent fessās nāvēs, ūlla ancora nōn alligat uncō morsū. hūc Aenēās, cum septem nāvibus collēctīs ex omnī numerō, subit; ac magnō amōre tellūris, Trōēs ēgressī sunt et potiuntur optātā harēnā, et pōnunt tābentēs artūs in lītore sale.
ac prīmum Achātēs excūdit scintilam silicī, et suscēpit ignem foliīs, atque dedit ārida nūtrīmenta circum, et rapuit flammam in fōmite. tum, fessī rērum, Trōiānī expediunt Cererem corruptam et arma Cereālia, et parant torrēre frūgēs receptās flammīs et frangere saxō.
Tier 4
- dēfessī Aeneadae, quae proxima lītora cursū
- contendunt petere et Libyae vertuntur ad ōrās.
- est in sēcessū longō locus: īnsula portum
- efficit obiectū laterum, quibus omnis ab altō
- frangitur inque sinūs scindit sēsē unda reductōs.
- hinc atque hinc vāstae rūpēs geminīque minantur
- in caelum scopulī, quōrum sub vertice lātē
- aequora tūta silent; tum silvīs scaena coruscīs
- dēsuper horrentīque ātrum nemus imminet umbrā.
- fronte sub adversā scopulīs pendentibus antrum;
- intus aquae dulcēs vīvōque sedīlia saxō,
- Nymphārum domus. hīc fessās nōn vincula nāvēs
- ūlla tenent, uncō nōn alligat ancora morsū.
- hūc septem Aenēās collēctīs nāvibus omnī
- ex numerō subit; ac magnō tellūris amōre
- ēgressī, optātā potiuntur Trōës harēnā,
- et sale tābentēs artūs in lītore pōnunt.
- ac prīmum silicī scintillam excūdit Achātēs,
- suscēpitque ignem foliīs, atque ārida circum
- nūtrīmenta dedit, rapuitque in fōmite flammam.
- tum Cererem corruptam undīs Cereāliaque arma
- expediunt fessī rērum, frūgēsque receptās
- et torrēre parant flammīs et frangere saxō.
P. Vergilius Maro, Aeneid 1.180-194
Tier 2
intereā Aenēās ascendit scopulum quod dēsīderāvit spectāre pelagum. voluit quaerere Anthea aut Phrygiās birēmēs aut Capyn aut arma Caīcī. Aenēās prōspicit nūllam nāvem sed prōspicit trēs cervōs in lītore. tōta armenta sequuntur hōs cervōs et aliī cervī pascuntur per vallēs.
Aenēās capit arcum et sagittās manū. prīmum mittit sagittās in ducēs quī habēbant capita alta cornibus arboreīs. tum miscet vulgus, agēns turbam tēlīs inter silvam. Aenēās fundit septem ingentia corpora terrā. Aenēās currit ad portum et dīvidet cervōs in omnēs sociōs.
Tier 3
intereā Aenēās cōnscendit scopulum, et petit omnem prōspectum lātē pelagō, sī videat aliquem Anthea iactātum ventō et Phrygiās birēmēs, aut Capyn, aut arma Caīcī in celsīs puppibus. Aenēās prōspicit nūllam nāvem in cōnspectū sed prōspicit trēs cervōs errantēs lītore; tōta armenta sequuntur hōs ā tergō, et agmen longum pascitur per vallēs.
cōnstitit hīc et corripuit arcum manū et sagittās celerēs, quae tēla fīdus Achātēs gerēbat; prīmum sternit ductōrēs ipsōs, ferentēs capita alta cornibus arboreīs, tum miscet vulgus et omnem, agēns turbam tēlīs inter frondea nemora; nec absistit prius quam, victor, fundat septem ingentia corpora humī et aequet numerum cum nāvibus.
hinc petit portum, et partītur in omnēs sociōs.
Tier 4
- Aenēās scopulum intereā cōnscendit, et omnem
- prōspectum lātē pelagō petit, Anthea sī quem
- iactātum ventō videat Phrygiāsque birēmēs,
- aut Capyn, aut celsīs in puppibus arma Caīcī.
- nāvem in cōnspectū nūllam, trēs lītore cervōs
- prōspicit errantēs; hōs tōta armenta sequuntur
- ā tergō, et longum per vallēs pascitur agmen.
- cōnstitit hīc arcumque manū celerēsque sagittās
- corripuit, fīdus quae tēla gerēbat Achātēs;
- ductōrēsque ipsōs prīmum, capita alta ferentēs
- cornibus arboreīs, sternit, tum vulgus et omnem
- miscet agēns tēlīs nemora inter frondea turbam;
- nec prius absistit quam septem ingentia victor
- corpora fundat humī et numerum cum nāvibus aequet;
- hinc portum petit, et sociōs partītur in omnēs.
P. Vergilius Maro, Aeneid 1.195-209
Tier 2
Aenēās revenit ad portum et dīvidit vīna. bonus hērōs, Acestēs, ponuerat haec vina amphorīs et dederat ea Aenēae in lītore Trīnacrō.
tunc Aenēās mulcet dolentia pectora verbīs: “ō sociī passī graviōra, (et scīmus mala), deus dabit fīnem hīs quoque.
“vōs appropinquavistis Scyllaeam furorem et sonāntēs scopulōs, vōs expertī estis saxa Cyclōpia. revocāte animōs et demittite timōrem; fortasse ōlim iuvābit vōs meminisse haec.
“per variōs casus, per tot pericula, petimus in Latium; ubi fāta dant nobis quiētās domōs. illīc est fās rēgna Trōiae resurgere. remanēte fortēs!”
Aenēās dixit tālia verba sed erat aeger ingentibus cūrīs. simulat spem vultū et premit dolōrem in corde.
Tier 3
deinde dīvidit vīna quae bonus hērōs Acestēs onerārat cadīs et dederat lītore Trīnacrō abeuntibus, et mulcet maerentia pectora dictīs: “ō sociī (neque enim sumus ignārī ante malōrum), ō passī graviōra, deus dabit fīnem hīs quoque.
“vōs et accestis Scyllaeam rabiem et penitus sonantēs scopulōs, vōs et expertī estis saxa Cyclōpia. revocāte animōs et mittite maestum timōrem; forsan ōlim iuvābit meminisse et haec. per variōs casus, per tot discrīmina rērum, tendimus in Latium; ubi fāta ostendunt quiētās sēdēs. illīc fās rēgna Trōiae resurgere. dūrāte, et vōsmet servāte secundīs rebus.”
refert tālia vōce, et aeger ingentibus cūrīs, simulat spem vultū, premit altum dolōrem corde.
Tier 4
- vīna bonus quae deinde cadīs onerārat Acestēs
- lītore Trīnacriō dederatque abeuntibus hērōs,
- dīvidit, et dictīs maerentia pectora mulcet:
- 'ō sociī (neque enim ignārī sumus ante malōrum),
- ō passī graviōra, dabit deus hīs quoque fīnem.
- vōs et Scyllaeam rabiem penitusque sonantēs
- accestis scopulōs, vōs et Cyclōpia saxa
- expertī: revocāte animōs maestumque timōrem
- mittite; forsan et haec ōlim meminisse iuvābit.
- per variōs casus, per tot discrīmina rērum
- tendimus in Latium; sēdēs ubi fāta quiētās
- ostendunt; illīc fās rēgna resurgere Trōiae.
- dūrāte, et vōsmet rēbus servāte secundīs.'
- tālia vōce refert, cūrīsque ingentibus aeger
- spem vultū simulat, premit altum corde dolōrem.