Bellātor iam stābat, sed manum in mūrō adhūc tenēbat. Octāviāna ad fenestram iit et urbem spectāvit. sōl altus erat, et in viā sub fenestrā hominēs et asinī iam ībant. post tōtum diem in marī caput eius adhūc dolēbat, et terra sub pedibus nimis quiēta erat.

Tertius nōn sedēbat. arcam clausit et vestem circum eam posuit, deinde eam sub bracchiō sustulit. dum hoc facit, arcam iterum atque iterum spectābat. lūx in arcā iam nōn mūtābātur, sed Tertius eam tamen spectābat.

"hīc manēre nōlō," inquit Tertius. "māchina hodiē nōn rēcta est."

"quid nōn rēctum est?" rogāvit Octāviāna.

Tertius manum in arcā tenuit. "nesciō," inquit, "et hoc mihi nōn placet. heri errōrem audīvistis. hodiē nihil audiō, et tamen aliquid nōn rēctum est."

Tertius ad iānuam iit, et Recentiī post eum iērunt. Bellātor manum tandem ā mūrō abstulit et caput manibus tenuit.

[TSTT SYSTEM MESSAGE: ERROR 1298B]

ubi Tertius iānuam aperuit, Octāviāna mūrum prope iānuam vīdit, et mūrus nimis prope erat: paene umerum eius tangēbat. Octāviāna gradum rettulit. deinde mūrus in locō suō erat, et inter mūrum et umerum spatium erat, et nihil aliud mūtātum erat. Tertius nōn respexit. Bellātor caput adhūc tenēbat et nihil vīdit.

in gradibus Tertius subitō cōnstitit, et Bellātor in tergum eius paene cecidit. Tertius sē vertit et Recentiōs spectāvit. vultus eius nōn īrātus erat, sed nōn erat vultus amīcī: erat vultus magistrī, et magister exspectābat.

"Poenī Lapidem cēpērunt," inquit Tertius. "hoc heri didicistis. et post bellum secundum Hannibal eum in Orientem tulit, sī hominēs vērum dīcunt. sed hominēs multa dīcunt. librī meliōrēs sunt."

"et librī in bibliothēcā sunt," inquit Octāviāna.

"librī in Mūsaeō sunt, et illūc īmus." Tertius arcam sub bracchiō iterum posuit. "sed prīmum vōs mihi dīcite: quid dē Mūsaeō scītis? ego vōbīs nōn nārrō. vōs mihi nārrātis."

extrā domum, duās viās longē, clāmor erat. nōn erat clāmor tabernae, ubi hominēs dē pretiō clāmant; hic clāmor maior erat, et nōn cessābat. Tertius eum audīvit et caput paulum vertit, sed nihil dē eō dīxit.

Bellātor manum ā capite dēmīsit. "Ptolemaeus," inquit, et rīsit. "hoc sciō. dē Ptolemaeō omnia sciō."

"omnia?" inquit Octāviāna. "nōmen sōlum scīs, et ego nōmen et omnia alia."

 quis Tertiō respondet?