C. Valerius Catullus, Carmen 68.87–100
The mention of Troy leads Catullus back to his brother. The passage is a second lament for him, set against the war the Greeks fought over Helen.
Tier 1
tum Trōia virōs prīmōs Graeciae ad sē vocābat, quia Helena rapta erat. Trōia, nefās, sepulcrum commūne Asiae et Eurōpae est; cinis trīstis virōrum et virtūtum omnium.
Trōia etiam frātrī meō mortem miseram tulit.
ō frāter, tū mihi miserō ēreptus es!
lūmen dulce frātris miserī periit. tēcum domus nostra et omnia gaudia periērunt; amor tuus ea in vītā alēbat.
nunc tū procul ā patriā es. nōn inter sepulcra nōta iacēs, nōn prope cinerēs familiae nostrae, sed in Trōiā foedā.
terra aliēna tē in extrēmīs fīnibus tenet.
Tier 2
tum Trōia ducēs Argīvōrum ad sēsē vocāre coeperat. Helenae raptū id fēcit.
Trōia, nefās, commūne sepulcrum Asiae Eurōpaeque est. Trōia est acerba cinis virōrum et omnium virtūtum.
quaene etiam nostrō frātrī mortem miserābilem attulit. ei, frāter miserō mihi adēmpte!
ei, miserō frātrī iūcundum lūmen adēmptum est. tēcum ūnā tōta nostra domus sepulta est.
omnia gaudia nostra tēcum ūnā periērunt. tuus dulcis amor ea in vītā alēbat.
tū nunc tam longē iacēs: nōn inter nōta sepulcra, nec prope cognātōs cinerēs compositus.
Trōia obscēna, Trōia īnfēlīx, tē sepultum dētinet.
terra aliēna extrēmō solō tē tenet.
Tier 3
nam tum Trōia coeperat ciēre ad sēsē prīmōrēs Argīvōrum virōs Helenae raptū, Trōia, nefās, commūne sepulcrum Asiae Eurōpaeque, Trōia, acerba cinis virum et omnium virtūtum, quaene etiam attulit lētum miserābile nostrō frātrī.
ei, frāter adēmpte miserō mihi, ei, iūcundum lūmen adēmptum miserō frātrī,
ūnā tēcum tōta nostra domus sepulta est, omnia nostra gaudia periērunt ūnā tēcum, quae tuus dulcis amor in vītā alēbat.
terra aliēna dētinet extrēmō solō quem nunc tam longē nōn inter nōta sepulcra nec prope compositum cognātōs cinerēs, sed sepultum Trōiā obscēnā, Trōiā īnfēlīce.
Tier 4 - Carmen Ipsum
- nam tum Helenae raptū prīmōrēs Argīvōrum
- coeperat ad sēsē Trōia ciēre virōs,
- Trōia (nefās!) commūne sepulcrum Asiae Eurōpaeque,
- Trōia virum et virtūtum omnium acerba cinis,
- quaene etiam nostrō lētum miserābile frātrī
- attulit. ei miserō frāter adēmpte mihi,
- ei miserō frātrī iūcundum lūmen adēmptum,
- tēcum ūnā tōta est nostra sepulta domus,
- omnia tēcum ūnā periērunt gaudia nostra,
- quae tuus in vītā dulcis alēbat amor.
- quem nunc tam longē nōn inter nōta sepulcra
- nec prope cognātōs compositum cinerēs,
- sed Trōiā obscēnā, Trōiā īnfēlīce sepultum
- dētinet extrēmō terra aliēna solō.
Original draft written by Robert Amstutz
