C. Valerius Catullus, Carmen 68.1–10
Catullus 68 is a long elegy that opens as a verse letter. A friend, addressed here as Manius (the manuscripts also give Mallius), has written to Catullus in distress, and this opening passage takes up what his letter asked.
Tier 1
Mānī, fortūna mala tē premit. epistulam lacrimīs plēnam ad mē mittis.
tū es sīcut vir in marī: undae magnae tē capiunt, et mors prope est. mē rogās: 'iuvā mē! ā morte mē servā!'
Venus tē nōn sinit dormīre. tū sōlus es, et somnus ad tē nōn venit. animus tuus timet, et tū nōn dormīs. etiam Mūsae tē nōn iuvant: carmina poētārum antīquōrum tibi nōn placent.
hoc mihi grātum est. dīcis mē amīcum tuum esse; itaque dōna Mūsārum et Veneris ā mē petis.
Tier 2
epistolium lacrimīs cōnscrīptum ad mē mittis. fortūnā cāsūque acerbō oppressus es.
naufragus es, ēiectus spūmantibus aequoris undīs. mē rogās: 'sublevā mē! ā līmine mortis restitue mē!'
sāncta Venus tē nōn perpetitur requiēscere mollī somnō. dēsertus es in lectō caelibe.
nec Mūsae tē dēlectant dulcī carmine veterum scrīptōrum. mēns tua anxia pervigilat.
id grātum est mihi. mē tibi amīcum dīcis. mūnera et Mūsārum et Veneris hinc petis.
Tier 3
id grātum est mihi, quod mittis mihi hoc epistolium cōnscrīptum lacrimīs, oppressus fortūnā cāsūque acerbō, ut sublevem naufragum ēiectum spūmantibus aequoris undīs et restituam ā mortis līmine,
quem neque sāncta Venus perpetitur requiēscere mollī somnō, dēsertum in lectō caelibe, nec Mūsae oblectant dulcī carmine veterum scrīptōrum, cum mēns anxia pervigilat:
quoniam dīcis mē amīcum tibi, hinc petis mūneraque et Mūsārum et Veneris.
Tier 4 - Carmen Ipsum
- quod mihi fortūnā cāsūque oppressus acerbō
- cōnscrīptum hoc lacrimīs mittis epistolium,
- naufragum ut ēiectum spūmantibus aequoris undīs
- sublevem et ā mortis līmine restituam,
- quem neque sāncta Venus mollī requiēscere somnō
- dēsertum in lectō caelibe perpetitur,
- nec veterum dulcī scrīptōrum carmine Mūsae
- oblectant, cum mēns anxia pervigilat:
- id grātum est mihi, mē quoniam tibi dīcis amīcum,
- mūneraque et Mūsārum hinc petis et Veneris.
Original draft written by Robert Amstutz
