C. Valerius Catullus, Carmen 50: To Licinius Calvus: Yesterday
Catullus writes to his friend Licinius Calvus, a fellow poet and orator, about a day the two of them spent together. The goddess Nemesis is named.
Tier 1
Licinī, herī lūsimus multum in meīs tabellīs, quod iūcundum esse putāverāmus:
nōs scrībentēs versūs parvōs lūdēbāmus numerō, reddentēs mūtua per iocum et per vīnum.
et īvī ab illō locō incēnsus tuā pulchritūdine, Licinī, et tuō sale
ut nec cibus mē miserum iuvāret nec somnus ocellōs tegeret,
sed versārer tōtō lectō, cupiēns vidēre lūcem ut tēcum loquerer et ut simul tēcum essem.
sed membra mea, dēfessa labōre et sēmimortua, iacēbant.
hoc poēma tibi scrīpsī, ex quō potes vidēre meum dolōrem.
nunc audāx, cavē, audī precēsque nostrās, ōrāmus, nōlī dēspuere, nē Nemesis poenās ā tē accipiat.
Nemesis est dea vēmēns; nōlī hanc īrātam facere.
Tier 2
Licinī, hesternō diē ōtiōsī lūsimus multum in meīs tabellīs, ut convēnerat esse dēlicātōs:
uterque nostrum scrībēns versiculōs lūdēbat numerō modo hōc modo illōc, reddēns mūtua per iocum atque vīnum.
atque abiī illinc incēnsus tuō lepōre, Licinī, facētiīsque,
ut nec cibus mē miserum iuvāret nec somnus ocellōs quiēte tegeret,
sed indomitus furōre tōtō lectō versārer, cupiēns vidēre lūcem, ut tēcum loquerer simulque essem.
at postquam membra dēfessa et sēmimortua labōre lectulō iacēbant, iūcunde,
hoc poēma tibi fēcī, ex quō perspicerēs meum dolōrem.
nunc audāx cavē sīs, precēsque nostrās, ōrāmus, cavē dēspuās, ocelle,
nē Nemesis reposcat poenās ā tē.
est vēmēns dea; cavētō laedere hanc.
Tier 3 - Carmen Ipsum
- hesternō, Licinī, diē ōtiōsī
- multum lūsimus in meīs tabellīs,
- ut convēnerat esse dēlicātōs:
- scrībēns versiculōs uterque nostrum
- lūdēbat numerō modo hōc modo illōc,
- reddēns mūtua per iocum atque vīnum.
- atque illinc abiī tuō lepōre
- incēnsus, Licinī, facētiīsque,
- ut nec mē miserum cibus iuvāret
- nec somnus tegeret quiēte ocellōs,
- sed tōtō indomitus furōre lectō
- versārer, cupiēns vidēre lūcem,
- ut tēcum loquerer, simulque ut essem.
- at dēfessa labōre membra postquam
- sēmimortua lectulō iacēbant,
- hoc, iūcunde, tibi poēma fēcī,
- ex quō perspicerēs meum dolōrem.
- nunc audāx cavē sīs, precēsque nostrās,
- ōrāmus, cavē dēspuās, ocelle,
- nē poenās Nemesis reposcat ā tē.
- est vehemēns dea: laedere hanc cavētō.
Original draft written by Robert Amstutz