C. Valerius Catullus, Carmen 45: To Septimius: A love story
A love poem about Septimius, a young Roman, and Acme, the Greek girl he loves. The god of love, Cupid (Amor), also has a part.
Tier 1
Septimius Acmēn in gremiō tenet.
"mea" inquit "Acmē, nisi tē amō et nisi parātus sum amāre tē perpetuē, quantum possibile est, sōlus in Libyā Indiāque tostā contrā caesium leōnem veniam."
ut dīxit hoc, Amor sternuit approbātiōnem sinistrā ut ante dextrā.
sed Acmē, reflectēns caput suum et bāsiāns ocellōs dulcis puerī
illō rubrō ōre, "sīc" inquit "mea vīta Septimille, serviāmus huic dominō sōlī, ut maior multō ignis in medullīs mihi ardet."
ut dīxit hoc, Amor sternuit approbātiōnem sinistrā ut ante dextrā.
nunc profectī ab auspiciō bonō Acmē et Septimius amant et amantur.
quis vīdit laetiōrēs hominēs?
quis vīdit Venerem auspicātiōrem?
Tier 2
Septimius tenēns Acmēn suōs amōrēs in gremiō,
"mea" inquit "Acmē, nī tē perditē amō atque parātus sum amāre tē omnēs annōs porrō, quantum quī pote plūrimum perīre, in Libyā Indiāque tostā sōlus obvius caesiō leōnī veniam."
ut dīxit hoc, Amor sternuit approbātiōnem sinistrā ut ante dextrā.
at Acmē, reflectēns leviter caput et suāviāta ēbriōs ocellōs dulcis puerī
illō purpureō ōre, "sīc" inquit "mea vīta Septimille, huic ūnī dominō ūsque serviāmus, ut maior ācriorque multō ignis in medullīs mollibus mihi ardet."
ut dīxit hoc, Amor sternuit approbātiōnem sinistrā ut ante dextrā.
nunc profectī ab auspiciō bonō mūtuīs animīs amant et amantur.
Septimius misellus ūnam Acmēn māvult quam Syriās Britanniāsque:
Acmē fidēlis dēliciās libīdinēsque facit in ūnō Septimiō.
quis ūllōs hominēs beātiōrēs vīdit,
quis Venerem auspicātiōrem vīdit?
Tier 3 - Carmen Ipsum
- Acmēn Septimius suōs amōrēs
- tenēns in gremiō 'mea' inquit 'Acmē,
- nī tē perditē amō atque amāre porrō
- omnēs sum assiduē parātus annōs,
- quantum quī pote plūrimum perīre,
- sōlus in Libyā Indiāque tostā
- caesiō veniam obvius leōnī.'
- hoc ut dīxit, Amor sinistrā ut ante
- dextrā sternuit approbātiōnem.
- at Acmē leviter caput reflectēns
- et dulcis puerī ēbriōs ocellōs
- illō purpureō ōre suāviāta,
- 'sīc' inquit 'mea vīta Septimille,
- huic ūnī dominō ūsque serviāmus,
- ut multō mihi maior ācriorque
- ignis mollibus ardet in medullīs.'
- hoc ut dīxit, Amor sinistrā ut ante
- dextrā sternuit approbātiōnem.
- nunc ab auspiciō bonō profectī
- mūtuīs animīs amant amantur.
- ūnam Septimius misellus Acmēn
- māvult quam Syriās Britanniāsque:
- ūnō in Septimiō fidēlis Acmē
- facit dēliciās libīdinēsque.
- quis ūllōs hominēs beātiōrēs
- vīdit, quis Venerem auspicātiōrem?
Original draft written by Robert Amstutz