C. Valerius Catullus, Carmen 44: Catullus' Estate
Catullus speaks to his farm, which lies on the border between the country of the Sabines and the district of Tibur. The politician Sestius and his speech against a man named Antius also figure in the poem.
Tier 1
ō ager meus, sīve tū Sabīnus sīve Tīburs es,
nam dīcunt tē esse Tīburtem, illī quī Catullum amant;
sed illī quī Catullum nōn amant, tē esse Sabīnum dīcunt.
sed sīve tū Sabīnus es sīve vērē Tīburs,
fuī laetus in tuā suburbānā vīllā,
et apud tē expulī malam tussim ē pectore meō,
tussim quam meus venter dedit mihi nōn sine causā,
dum ego volō sūmptuōsōs cibōs.
nam, dum volō esse convīva Sestiī, lēgī ōrātiōnem in Antium, ōrātiōnem plēnam venēnī et pestilentiae.
hīc frīgidus morbus et frequēns tussis ūsque afflīxit mē,
dum fūgī ad tē,
et sānāvī mē et ōtiō et herbā medicīnā.
quārē sānus ego maximās grātiās tibi agō, quod tū mē amās etiam sī malum faciō.
nec mē sollicitat legere iterum nefāria scrīpta Sestī,
sī frīgus petit Sestium tussī nec mē,
Sestium quī tunc vocat mē, cum lēgī malum librum.
Tier 2
ō funde noster, seu Sabīne seu Tīburs,
(nam autumant tē esse Tīburtem, quibus nōn est cordī laedere Catullum;
at quibus est cordī, contendunt Sabīnum quōvīs pignore esse),
sed seu Sabīne sīve vērius Tīburs,
fuī libenter in tuā suburbānā vīllā,
expulīque malam tussim pectore,
quam meus venter dedit mihi nōn inmerentī,
dum appetō sūmptuōsās cēnās.
nam, dum volō esse Sestiānus convīva, lēgī ōrātiōnem in petītōrem Antium, plēnam venēnī et pestilentiae.
hīc frīgida gravēdō et frequēns tussis quassāvit mē ūsque,
dum fūgī in tuum sinum,
et recūrāvī mē ōtiōque et urtīcā.
quārē refectus grātēs maximās tibi agō, quod nōn ultus es meum peccātum.
nec dēprecor quīn iam, sī nefāria scrīpta Sestī recepsō,
frīgus ferat gravēdinem et tussim nōn mihi sed Sestiō ipsī,
quī tunc vocat mē, cum lēgī malum librum.
Tier 3 - Carmen Ipsum
- ō funde noster seu Sabīne seu Tīburs
- (nam tē esse Tīburtem autumant, quibus nōn est
- cordī Catullum laedere; at quibus cordī est,
- quōvīs Sabīnum pignore esse contendunt),
- sed seu Sabīne sīve vērius Tīburs,
- fuī libenter in tuā suburbānā
- vīllā, malamque pectore expulī tussim,
- nōn inmerentī quam mihi meus venter,
- dum sūmptuōsās appetō, dedit, cēnās.
- nam, Sestiānus dum volō esse convīva,
- ōrātiōnem in Antium petītōrem
- plēnam venēnī et pestilentiae lēgī.
- hīc mē gravēdō frīgida et frequēns tussis
- quassāvit ūsque, dum in tuum sinum fūgī,
- et mē recūrāvī ōtiōque et urtīcā.
- quārē refectus maximās tibi grātēs
- agō, meum quod nōn es ultus peccātum.
- nec dēprecor iam, sī nefāria scrīpta
- Sestī recepsō, quīn gravēdinem et tussim
- nōn mihi, sed ipsī Sestiō ferat frīgus,
- quī tunc vocat mē, cum malum librum lēgī.
Original draft written by Robert Amstutz