C. Valerius Catullus, Carmen 42: To his Poetry: Get my tablets back!
Catullus summons his hendecasyllables (the verses he writes in) as if they were a gang of followers. A woman has kept his writing tablets, and the poem is aimed at her.
Tier 1
versūs meī, omnēs vōs adeste,
foeda moecha putat mē esse iocum, et nōn reddet tabulās meās mihi, sī potestis crēdere.
nōs sequāmur eam et iubeāmus eam reddere tabulās.
quae est illa puella?
illa puella quam vōs vidētis ambulāre turpe, rīdentem ut canis.
īte ad eam et iubēte eam "moecha quae male olet, redde tabulās!"
moecha nihil cūrat? moecha est foeda et meretrīx aut aliquid peius.
sed tamen hoc nōn satis est.
sī nōn potest aliud, faciāmus eam rubēre ōre dūrō sīcut canis.
clāmāte vōce maiōre.
"moecha quae male olet, redde tabulās!"
sed sī ea nōn reddet tabulās mihi, necesse est nōbīs ratiōnem et modum mūtāre:
"bona puella, redde tabulās."
Tier 2
hendecasyllabī, adeste quot estis omnēs undique, quotquot omnēs estis.
turpis moecha putat mē esse iocum, et negat redditūram nostra pugillāria mihi, sī potestis patī.
persequāmur eam et reflāgitēmus.
quae sit, quaeritis?
illa, quam vidētis incēdere turpe, rīdentem mīmicē ac molestē ōre catulī Gallicānī.
circumsistite eam, et reflāgitāte, "pūtida moecha, redde cōdicillōs, redde cōdicillōs, pūtida moecha!"
nōn facis assis? ō lutum, lupānar, aut sī potes esse quid perditius.
sed tamen hoc nōn putandum est satis.
quod sī nōn aliud potest, exprimāmus rubōrem ferreō ōre canis.
iterum conclāmāte altiōre vōce.
"pūtida moecha, redde cōdicillōs, redde cōdicillōs, pūtida moecha!"
sed prōficimus nīl, nihil movētur.
ratiō modusque mūtanda est vōbīs, sīquid potestis prōficere amplius:
"pudīca et proba, redde cōdicillōs."
Tier 3 - Carmen Ipsum
- adeste, hendecasyllabī, quot estis
- omnēs undique, quotquot estis omnēs.
- iocum mē putat esse moecha turpis,
- et negat mihi nostra redditūram
- pugillāria, sī patī potestis.
- persequāmur eam et reflāgitēmus.
- quae sit, quaeritis? illa, quam vidētis
- turpe incēdere, mīmicē ac molestē
- rīdentem catulī ōre Gallicānī.
- circumsistite eam, et reflāgitāte,
- 'moecha pūtida, redde cōdicillōs,
- redde, pūtida moecha, cōdicillōs!'
- nōn assis facis? ō lutum, lupānar,
- aut sī perditius potes quid esse.
- sed nōn est tamen hoc satis putandum.
- quod sī nōn aliud potest, rubōrem
- ferreō canis exprimāmus ōre.
- conclāmāte iterum altiōre vōce.
- 'moecha pūtida, redde cōdicillōs,
- redde, pūtida moecha, cōdicillōs!'
- sed nīl prōficimus, nihil movētur.
- mūtanda est ratiō modusque vōbīs,
- sīquid prōficere amplius potestis:
- 'pudīca et proba, redde cōdicillōs.'
Original draft written by Robert Amstutz