C. Valerius Catullus, Carmen 39: To Egnatius: What bright teeth you have...
An insult poem against Egnatius, the Spaniard of poem 37, who is known for his gleaming white teeth. Its closing lines are crude.
Tier 1
Egnātius semper subrīdet quia habet dentēs candidōs,
sī rēs venit ad iūdicem, cum ōrātor excitat lacrimās,
ille subrīdet;
sī est ignis fūneris fīliō piō, cum māter lūget fīlium sōlum,
ille subrīdet;
quidquid est, ubicumque est, quodcumque agit, Egnātius subrīdet:
Egnātius aeger est in hōc modō, ut putō, neque est ēlegāns neque urbānus est.
ergō necesse est mihi tē monēre, bone Egnātī.
sī vidērī urbānus vīs
quisquis sīs populōrum quī dentēs suōs pūriter lāvērunt,
tamen nōllem tē subrīdēre ūsque ubicumque:
nam nūlla rēs est ineptior ineptō rīsū.
nunc es Hispānicus: in Hispāniā mōs est hic
vir mingit deinde lavat dentēs suōs ūrīnā suā
itaque dentēs tuī candidī ostendunt tē bibere ūrīnam.
Tier 2
Egnātius, quod habet candidōs dentēs,
ūsque quāque renīdet.
sī ventum est ad subsellium reī, cum ōrātor excitat flētum,
ille renīdet;
sī lūgētur ad rogum fīlī piī, cum orba māter flet ūnicum,
ille renīdet;
quidquid est, ubicumque est, quodcumque agit, renīdet:
habet hunc morbum, ut arbitror, neque ēlegantem neque urbānum.
quārē tē, bone Egnātī, monendum est mihi.
sī essēs urbānus
aut Sabīnus aut Tīburs aut pinguis Umber aut obēsus Etrūscus aut āter atque dentātus Lānuvīnus
aut Trānspadānus, ut attingam meōs quoque,
aut quīlubet, quī dentēs pūriter lavit,
tamen nōllem tē renīdēre ūsque quāque:
nam nūlla rēs est ineptior ineptō rīsū.
nunc es Celtibēr: in terrā Celtibēriā,
quod quisque mīnxit, māne solet sibi dentem atque gingīvam russam hōc dēfricāre,
ut iste vester dēns quō est expolītior,
hōc praedicet tē amplius bibisse lōtī.
Tier 3 - Carmen Ipsum
- Egnātius, quod candidōs habet dentēs,
- renīdet ūsque quāque. sī ad reī ventum est
- subsellium, cum ōrātor excitat flētum,
- renīdet ille; sī ad piī rogum fīlī
- lūgētur, orba cum flet ūnicum māter,
- renīdet ille. quidquid est, ubicumque est,
- quodcumque agit, renīdet: hunc habet morbum,
- neque ēlegantem, ut arbitror, neque urbānum.
- quārē monendum est tē mihi, bone Egnātī.
- sī urbānus essēs aut Sabīnus aut Tīburs
- aut pinguis Umber aut obēsus Etrūscus
- aut Lānuvīnus āter atque dentātus
- aut Trānspadānus, ut meōs quoque attingam,
- aut quīlubet, quī pūriter lavit dentēs,
- tamen renīdēre ūsque quāque tē nōllem:
- nam rīsū ineptō rēs ineptior nūlla est.
- nunc Celtibēr es: Celtibēria in terrā,
- quod quisque mīnxit, hōc sibi solet māne
- dentem atque russam dēfricāre gingīvam,
- ut quō iste vester expolītior dēns est,
- hōc tē amplius bibisse praedicet lōtī.
Original draft written by Robert Amstutz