C. Valerius Catullus, Carmen 36: A Sacrifice: Volusius' Annales
Catullus addresses the Annals of Volusius, a long history in verse, about a vow his girl has made to Venus and Cupid. The poem's language about the book is crude.
Tier 1
Annālēs Volusī, cacāta pāgina, solvite vōtum prō meā puellā.
nam prōmīsit sānctae Venerī et Cupīdinī, sī ego restitūtus essem sibi et ego dēsissem scrībere saeva carmina,
prōmīsit sē datūram ēlēctissima scrīpta pessimī poētae deō Vulcānō igne.
et puella misera vīdit sē prōmittere hoc deīs quasi ad rīsum.
nunc ō Venus creāta caeruleō ōceanō, tū quae habitās multīs in locīs,
accipe prōmissum perfectum sī venustum est.
sed vōs, Annālēs Volusī, cacāta pāgina, rūstica et sine urbānitāte, venīte in ignem.
Tier 2
Annālēs Volusī, cacāta carta, solvite vōtum prō meā puellā.
nam vōvit sānctae Venerī Cupīdinīque, sī [ego] restitūtus essem sibi, et dēsissem vibrāre trucēs iambōs,
[sē] datūram ēlēctissima scrīpta pessimī poētae tardipedī deō ūstulanda īnfēlīcibus lignīs.
et puella pessima vīdit sē vovēre hoc dīvīs iocōsē lepidē.
nunc ō creāta [es] caeruleō pontō, quae colis sānctum Īdalium Ūriōsque apertōs
quaeque [colis] Ancōna harundinōsamque Cnidum
quaeque Amathūnta quaeque Golgōs quaeque Durrachium, tabernam Hadriae,
face vōtum acceptum redditumque sī nōn illepidum neque invenustum est.
at vōs, Annālēs Volusī, cacāta carta, plēnī rūris et īnficētiārum, intereā venīte in ignem.
Tier 3 - Carmen Ipsum
- Annālēs Volusī, cacāta carta,
- vōtum solvite prō meā puellā.
- nam sānctae Venerī Cupīdinīque
- vōvit, sī sibi restitūtus essem
- dēsissemque trucēs vibrāre iambōs,
- ēlēctissima pessimī poētae
- scrīpta tardipedī deō datūram
- īnfēlīcibus ūstulanda lignīs.
- et hoc pessima sē puella vīdit
- iocōsē lepidē vovēre dīvīs.
- nunc ō caeruleō creāta pontō,
- quae sānctum Īdalium Ūriōsque apertōs
- quaeque Ancōna Cnidumque harundinōsam
- colis quaeque Amathūnta quaeque Golgōs
- quaeque Durrachium Hadriae tabernam,
- acceptum face redditumque vōtum,
- sī nōn illepidum neque invenustum est.
- at vōs intereā venīte in ignem,
- plēnī rūris et īnficētiārum.
- Annālēs Volusī, cacāta carta.
Original draft written by Robert Amstutz