C. Valerius Catullus, Carmen 31: Sirmio
Catullus speaks to Sirmio, his family's home on a peninsula in Lake Garda, on his return from a year of service in Bithynia.
Tier 1
Sirmiō, gemma paene īnsulārum et īnsulārum, gemma omnium quās Neptūnus fert aut in aquā inter terrās aut in ōceanō vāstō,
quam libenter et laetus tē videō,
ego ipse vix crēdō mī relīquisse Thūniam et Bithūnōs campōs et mē vidēre tē sēcūrum.
ō quid est laetius quam relinquere cūrās, cum mēns repōnit labōrem, et fessī labōre in terrā aliēnā vēnimus ad nostrum larem, et iacēmus in dēsīderātō lectō?
hoc est ūnum quod est prō tantīs labōribus.
salvē ō Sirmiō, et es laeta cum dominō laetō, et vōs, ō lacūs Lȳdiae aquae, rīdēte rīsū domī.
Tier 2
Sirmiō, paene īnsulārum ocelleque īnsulārum, quāscumque Neptūnus fert uterque in liquentibus stagnīs marīque vāstō,
quam libenter invīsō tē, quamque laetus tē invīsō,
ipse vix crēdēns mī līquisse Thūniam atque Bithūnōs campōs et vidēre tē in tūtō.
ō quid est beātius solūtīs cūrīs, cum mēns repōnit onus, ac fessī peregrīnō labōre vēnimus ad nostrum larem, acquiēscimusque dēsīderātō lectō?
hoc est ūnum quod est prō tantīs labōribus.
salvē, ō venusta Sirmiō, atque gaudē erō gaudente, vōsque, ō lacūs Lȳdiae undae, rīdēte quidquid cachinnōrum est domī.
Tier 3 - Carmen Ipsum
- paene īnsulārum, Sirmiō, īnsulārumque
- ocelle, quāscumque in liquentibus stagnīs
- marīque vāstō fert uterque Neptūnus,
- quam tē libenter quamque laetus invīsō,
- vix mī ipse crēdēns Thūniam atque Bithūnōs
- līquisse campōs et vidēre tē in tūtō.
- ō quid solūtīs est beātius cūrīs,
- cum mēns onus repōnit, ac peregrīnō
- labōre fessī vēnimus larem ad nostrum,
- dēsīderātōque acquiēscimus lectō?
- hoc est quod ūnum est prō labōribus tantīs.
- salvē, ō venusta Sirmiō, atque erō gaudē
- gaudente, vōsque, ō Lȳdiae lacūs undae,
- rīdēte quidquid est domī cachinnōrum.
Original draft written by Robert Amstutz