C. Valerius Catullus, Carmen 22: To Varus: Glass Houses
Catullus writes to his friend Varus about Suffenus, a charming acquaintance of theirs who writes a great deal of poetry. The poem is about the gap between the man and his verses.
Tier 1
Vāre, iste Suffēnus est vir pulcher et dīcit multa et urbānus.
scrībit multōs versūs, putō mīlia aut fortasse plūra.
nec versūs scrīptī sunt in chartā ūsā sed in bonīs librīs, in novā chartā. librī eius optimī videntur, sed tantum videntur.
cum librum eius legās, Suffēnus vidētur esse alius homō: nōn urbānus, sed rūsticus.
cūr ita est? herī sapiēns vidēbātur, nunc stultus cum scrībit.
Suffēnus gaudet, sē amat, putat sē esse pulchrum.
omnēs hominēs item falluntur. in ūnōquōque est Suffēnus.
quisque habet suum vitium, sed nōn possumus post nōs vidēre.
Tier 2
Vāre, iste Suffēnus, quem probē nōstī, est homō venustus et dicāx et urbānus, īdemque facit longē plūrimōs versūs.
ego putō aut decem mīlia aut plūra ab illō esse perscrīpta, nec relāta sīc, ut fit, in palimpsēstō:
rēgiae cartae, novī librī, novī umbilīcī, rubra lōra membrānae, omnia dērēcta plumbō et aequāta pūmice.
cum tū haec legās, ille bellus et urbānus Suffēnus vidētur rūrsus ūnus caprimulgus aut fossor: tantum abhorret et mūtat.
quid putēmus hoc esse? quī modo vidēbātur scurra aut sī quid scītius hāc rē,
īdem est īnfacētior rūre īnfacētō, simul attigit poēmata,
neque umquam īdem est aequē beātus ac cum scrībit poēma:
tam gaudet in sē ipse tamque sē mīrātur.
nīmīrum idem omnēs fallimur, neque est quisquam quem nōn possīs vidēre Suffēnum in aliquā rē.
suus error est attribūtus cuique; sed nōn vidēmus [partem] manticae quod est in tergō.
Tier 3 - Carmen Ipsum
- Suffēnus iste, Vāre, quem probē nōstī,
- homō est venustus et dicāx et urbānus,
- īdemque longē plūrimōs facit versūs.
- putō esse ego illī mīlia aut decem aut plūra
- perscrīpta, nec sīc ut fit in palimpsēstō
- relāta: cartae rēgiae, novī librī,
- novī umbilīcī, lōra rubra membrānae,
- dērēcta plumbō et pūmice omnia aequāta.
- haec cum legās tū, bellus ille et urbānus
- Suffēnus ūnus caprimulgus aut fossor
- rūrsus vidētur: tantum abhorret ac mūtat.
- hoc quid putēmus esse? quī modo scurra
- aut sī quid hāc rē scītius vidēbātur,
- īdem īnfacētō est īnfacētior rūre,
- simul poēmata attigit, neque īdem umquam
- aequē est beātus ac poēma cum scrībit:
- tam gaudet in sē tamque sē ipse mīrātur.
- nīmīrum idem omnēs fallimur, neque est quisquam
- quem nōn in aliquā rē vidēre Suffēnum
- possīs. suus cuique attribūtus est error;
- sed nōn vidēmus manticae quod in tergō est.
Original draft written by Robert Amstutz