C. Valerius Catullus, Carmen 17: The town of Colonia Veneta
Catullus addresses Colonia, a small town whose location is unknown, about its old and shaky wooden bridge. The poem is about one of Catullus's own townsmen, a remarkably dull man married to a young wife.
Tier 1
ō Colōnia, tū vīs lūdere super longum pontem, et parāta es saltāre, sed timēs nē pōns in aquam cadat quod pōns ē lignō parvō antīquōque factus est:
pōns sīc fīat bonus tibi, ut tē dēlectat. sit pōns in quō etiam rītūs Salisubsalī suscipiantur,
dā mihi hoc dōnum, rīsum maximum, Colōnia.
volō cīvem meum dē ponte tuō in lutum cadere, per caput et pedēs.
est vir stultissimus, sīcut īnfāns quī in brachiīs patris dormit.
etsī habet uxōrem pulchram, teneram puellam similem tenerō caprō īnfantīlī, quam necesse est cūrāre sīcut pretiōsās ūvās,
sinit eam lūdere cum aliīs, ipse nihil cūrat, nec sē movet, sed iacet sīcut arbor frācta, et tam mortuus quam rēs nūlla vidētur.
tālis est hic: nihil videt nihil audit. nescit sē nec sī vīvit.
nunc volō eum cadere dē ponte, ut excitētur et animum plānum in lutō relinquat sīcut mūla soleam ferream in locō profundō.
Tier 2
ō Colōnia, quae cupis lūdere super ponte longō,
et parāta es saltāre, sed verēris crūra inepta ponticulī stantis in axulīs redivīvīs, nē supīnus eat et recumbat in cavāque palūde:
sīc fīat tibi bonus pōns ex tuā libīdine, in quō sacra vel Salisubsalī suscipiantur, hoc dā mihi mūnus maximī rīsūs, Colōnia.
volō quendam mūnicipem meum īre praecipitem dē tuō ponte in lutum,
per caput et pedēs in profundam vorāginem, quae est maximē līvidissima tōtīus lacūs pūtidaeque palūdis.
homō īnsulsissimus est, nec sapit īnstar puerī bīmulī dormientis in tremulā ulnā patris.
cui puella nūpta est viridissimō flōre, puella dēlicātior tenellulō haedō, adservanda dīligentissimē nigerrimīs ūvīs.
hanc sinit lūdere ut lubet, nec facit pilī ūnī, nec sē sublevat ex suā parte, sed iacet velut alnus in fossā suppernāta Ligurī secūrī, sentiēns omnia tantundem ac sī nūlla sit usquam.
tālis est iste stupor meus: nihil videt, nihil audit, ipse nescit quī sit, utrum sit an nōn sit.
nunc volō mittere eum prōnum dē tuō ponte, sī forte possim excitāre stolidum veternum, et relinquere supīnum animum in gravī caenō, ut mūla soleam ferream in tenācī vorāgine.
Tier 3 - Carmen Ipsum
- ō Colōnia, quae cupis ponte lūdere longō,
- et salīre parātum habēs, sed verēris inepta
- crūra ponticulī axulīs stantis in redivīvīs,
- nē supīnus eat cavāque in palūde recumbat:
- sīc tibi bonus ex tuā pōns libīdine fīat,
- in quō vel Salisubsalī sacra suscipiantur,
- mūnus hoc mihi maximī dā, Colōnia, rīsūs.
- quendam mūnicipem meum dē tuō volō ponte
- īre praecipitem in lutum per caputque pedēsque,
- vērum tōtīus ut lacūs pūtidaeque palūdis
- līvidissima maximēque est profunda vorāgō.
- īnsulsissimus est homō, nec sapit puerī īnstar
- bīmulī tremulā patris dormientis in ulnā.
- cui cum sit viridissimō nūpta flōre puella
- et puella tenellulō dēlicātior haedō,
- adservanda nigerrimīs dīligentius ūvīs,
- lūdere hanc sinit ut lubet, nec pilī facit ūnī,
- nec sē sublevat ex suā parte, sed velut alnus
- in fossā Ligurī iacet suppernāta secūrī,
- tantundem omnia sentiēns quam sī nūlla sit usquam;
- tālis iste meus stupor nīl videt, nihil audit,
- ipse quī sit, utrum sit an nōn sit, id quoque nescit.
- nunc eum volō dē tuō ponte mittere prōnum,
- sī pote stolidum repente excitāre veternum,
- et supīnum animum in gravī dērelinquere caenō,
- ferream ut soleam tenācī in vorāgine mūla.
Original draft written by Robert Amstutz