C. Valerius Catullus, Carmen 13: To Fabullus: A Dinner Invitation
Catullus invites his friend Fabullus to dinner. The poem sets out the terms of the invitation.
Tier 1
mī Fabulle, cēnam bonam habēbis apud vīllam meam in paucīs diēbus, sī dī tē amant, sī tēcum portābis bonam magnamque cēnam, et sī ferēs candidam puellam, et sī ferēs vīnum salemque et sī ferēs cachinnōs.
dīcō, sī haec ad vīllam meam portābis, cēnam bonam habēbis; nam sacculus tuī Catullī vacuus est.
sed dabō tibi vērōs amōrēs vel dabō id quod suāvius ēlegantiusve est: nam dabō tibi unguentum, quod Venus Cupīdōque puellae meae dedit.
unguentum quod cum tū olfaciēs, rogābis deōs ut tē faciant tōtum nāsum.
Tier 2
mī Fabulle, cēnābis bene apud mē paucīs diēbus, sī tibi dī favent, sī tēcum attuleris bonam atque magnam cēnam, nōn sine candidā puellā, et vīnō et sale et omnibus cachinnīs.
inquam, sī haec attuleris, venuste noster, cēnābis bene; nam sacculus tuī Catullī plēnus arāneārum est.
sed contrā accipiēs merōs amōrēs seu quid suāvius ēlegantiusve est: nam dabō unguentum, quod Venerēs Cupīdinēsque dōnārunt meae puellae, quod tū cum olfaciēs, deōs rogābis ut tē, Fabulle, tōtum nāsum faciant.
Tier 3 - Carmen Ipsum
- cēnābis bene, mī Fabulle, apud mē
- paucīs, sī tibi dī favent, diēbus,
- sī tēcum attuleris bonam atque magnam
- cēnam, nōn sine candidā puellā
- et vīnō et sale et omnibus cachinnīs.
- haec sī, inquam, attuleris, venuste noster,
- cēnābis bene; nam tuī Catullī
- plēnus sacculus est arāneārum.
- sed contrā accipiēs merōs amōrēs
- seu quid suāvius ēlegantiusve est:
- nam unguentum dabō, quod meae puellae
- dōnārunt Venerēs Cupīdinēsque,
- quod tū cum olfaciēs, deōs rogābis,
- tōtum ut tē faciant, Fabulle, nāsum.
Original draft written by Robert Amstutz