C. Valerius Catullus, Carmen 11: To Furius and Aurelius: Words for Lesbia
Catullus asks two companions, Furius and Aurelius, to carry a short message to Lesbia. The poem first ranges over the edges of the known world, from India to the Rhine and Britain, where Julius Caesar was then campaigning.
Tier 1
amīcī meī, Fūrī et Aurēlī,
sīve ībit in extrēmōs Indōs, ubi unda oriēns pulsat lītus,
sīve ībit in Hyrcānōs vel mollēs Arabēs, seu in Sagās vel Parthōs quī sagittās ferunt, sīve ubi Nīlus, habēns septem ōra, colōrat ōceanōs,
sīve ambulābit trāns altās Alpēs, vidēns monimenta magnī Caesaris, Gallicum Rhēnum, horribile mare quod inter Britanniam et Galliam est, et ultimōs Britannōs,
quidquid deī eī portābunt, praeparātī temptāre omnia haec,
dīcite meae puellae pauca mala verba.
puella vīvat et valeat cum suīs amantibus, eōs quōs tenet, complexa omnēs trecentōs simul, amāns nūllum, sed iterum et iterum rumpēns īlia omnium;
nec mea puella respectet meum amōrem, ut ante,
meum amōrem quī mortuus est propter eam sīcut flōs ultimī campī postquam arātrum flōrem tangit.
Tier 2
comitēs Catullī, Fūrī et Aurēlī,
sīve penetrābit in extrēmōs Indōs, ut lītus tunditur longē resonante Ēōā undā,
sīve in Hyrcānōs Arabēsve mollēs, seu Sagās sagittiferōsve Parthōs, sīve quae septemgeminus Nīlus colōrat aequora,
sīve gradiētur trāns altās Alpēs, vīsēns monimenta magnī Caesaris, Gallicum Rhēnum, horribile aequor, ultimōsque Britannōs,
quaecumque voluntās caelitum feret, parātī temptāre simul omnia haec,
nūntiāte pauca nōn bona dicta meae puellae.
vīvat valeatque cum suīs moechīs, quōs tenet complexa trecentōs simul, vērē amāns nūllum, sed identidem rumpēns īlia omnium;
nec respectet meum amōrem, ut ante,
quī cecidit culpā illīus velut flōs ultimī prātī, postquam tāctus est praetereunte arātrō.
Tier 3 - Carmen Ipsum
- Fūrī et Aurēlī comitēs Catullī,
- sīve in extrēmōs penetrābit Indōs,
- lītus ut longē resonante Ēōā
- tunditur undā,
- sīve in Hyrcānōs Arabēsve mollēs,
- seu Sagās sagittiferōsve Parthōs,
- sīve quae septemgeminus colōrat
- aequora Nīlus,
- sīve trāns altās gradiētur Alpēs,
- Caesaris vīsēns monimenta magnī,
- Gallicum Rhēnum horribile aequor ulti-
- mōsque Britannōs,
- omnia haec, quaecumque feret voluntās
- caelitum, temptāre simul parātī,
- pauca nūntiāte meae puellae
- nōn bona dicta.
- cum suīs vīvat valeatque moechīs,
- quōs simul complexa tenet trecentōs,
- nūllum amāns vērē, sed identidem omnium
- īlia rumpēns;
- nec meum respectet, ut ante, amōrem,
- quī illius culpā cecidit velut prātī
- ultimī flōs, praetereunte postquam
- tāctus arātrō est.
Original draft written by Robert Amstutz