C. Valerius Catullus, Carmen 8: To himself: Forget Lesbia
Catullus speaks to himself, addressing himself by name, about the end of his affair with Lesbia.
Tier 1
miser Catulle, dēsiste esse stultus, et id quod mortuum esse vidēs, mortuum intellege.
quondam clārī sōlēs tibi lūxērunt,
cum tū veniēbās iterum et iterum quō puella dūcēbat, puella amāta nōbīs quantum nūlla amābitur.
ibi cum illa multa iūcunda erant, rēs quae tū volēbās nec puella nōlēbat,
vērē clārī sōlēs tibi lūxērunt.
nunc illa nōn vult: tū quoque impotēns nōlī,
nec sequere illam quae fugit, nec vīve miser, sed perfer obstinātā mente, obdūrā.
valē puella, iam Catullus obdūrat, nec tē requīret nec puellam invītam rogābit.
at tū trīstis eris cum nōn rogāberis.
mala puella, vae tē, quae vītam habēbis?
quis nunc tē adībit? quis tē bellam esse putābit? quem nunc amābis? cuius amīca eris?
cui ōscula dabis? cui labra mordēbis? at tū, Catulle, es fortis.
Tier 2
miser Catulle, dēsinās ineptīre, et quod vidēs perīsse, dūcās perditum.
quondam candidī sōlēs fulsērunt tibi,
cum ventitābās quō puella dūcēbat, [puella] amāta nōbīs quantum nūlla amābitur.
ibi cum illa multa iocōsa fīēbant, quae tū volēbās nec puella nōlēbat,
vērē candidī sōlēs fulsēre tibi.
nunc iam illa nōn vult: impotēns tū quoque nōlī, nec sectāre quae fugit, nec vīve miser, sed perfer obstinātā mente, obdūrā.
valē puella, iam Catullus obdūrat, nec tē requīret nec rogābit invītam.
at tū dolēbis, cum rogāberis nūlla.
vae tē, scelesta, quae vīta manet tibi?
nunc quis adībit tē? cui vidēberis bella? nunc quem amābis? cuius dīceris esse?
quem bāsiābis? cui labella mordēbis? at tū Catulle, obdūrā dēstinātus.
Tier 3 - Carmen Ipsum
- miser Catulle, dēsinās ineptīre,
- et quod vidēs perīsse perditum dūcās.
- fulsēre quondam candidī tibi sōlēs,
- cum ventitābās quō puella dūcēbat
- amāta nōbīs quantum amābitur nūlla.
- ibi illa multa cum iocōsa fīēbant,
- quae tū volēbās nec puella nōlēbat,
- fulsēre vērē candidī tibi sōlēs.
- nunc iam illa nōn vult: tū quoque impotēns nōlī,
- nec quae fugit sectāre, nec miser vīve,
- sed obstinātā mente perfer, obdūrā.
- valē puella, iam Catullus obdūrat,
- nec tē requīret nec rogābit invītam.
- at tū dolēbis, cum rogāberis nūlla.
- scelesta, vae tē, quae tibi manet vīta?
- quis nunc tē adībit? cui vidēberis bella?
- quem nunc amābis? cuius esse dīceris?
- quem bāsiābis? cui labella mordēbis?
- at tū, Catulle, dēstinātus obdūrā.
Original draft written by Robert Amstutz