C. Valerius Catullus, Carmen 3: The Death of Lesbia's Sparrow
Catullus mourns the death of his girlfriend's sparrow, the bird of the previous poem. The world of the dead appears as the realm of Orcus.
Tier 1
plōrāte omnēs. passer, avis parva, meae puellae mortuus est.
passer quem mea puella plūs quam oculōs suōs amābat. nam passer dulcis erat et puellam nōverat tam bene quam puella mātrem nōverat.
nec passer sē ā puellā movēbat, sed circumsiliēns modo hūc modo illūc ad sōlam dominam pīpiābat et pīpiābat.
passer quī nunc it ad īnferōs. locus unde omnēs negant quemquam redīre.
sed male sit vōbīs, malae tenebrae Orcī, vōbīs quae omnia pulchra dēvorātis.
vōs tam bellum passerem ā mē cēpistis. ō factum male! ō miser parve passer!
nunc ocellī meae puellae, turgidulī flendō tuā operā, rubent.
Tier 2
lūgēte, ō Venerēs Cupīdinēsque, et quantum est hominum venustiōrum: passer meae puellae mortuus est,
passer dēliciae meae puellae, quem illa plūs oculīs suīs amābat. nam mellītus erat et suam ipsam nōverat tam bene quam puella mātrem nōverat,
nec passer sē ā gremiō illīus movēbat, sed circumsiliēns modo hūc modo illūc ad sōlam dominam ūsque pīpiābat.
passer quī nunc it per iter tenebricōsum, illūc unde negant quemquam redīre.
at male sit vōbīs, malae tenebrae Orcī, quae omnia bella dēvorātis:
tam bellum mihi passerem abstulistis. ō factum male! ō miselle passer!
nunc tuā operā ocellī meae puellae, turgidulī flendō rubent.
Tier 3 - Carmen Ipsum
- lūgēte, ō Venerēs Cupīdinēsque,
- et quantum est hominum venustiōrum:
- passer mortuus est meae puellae,
- passer, dēliciae meae puellae,
- quem plūs illa oculīs suīs amābat.
- nam mellītus erat suamque nōrat
- ipsam tam bene quam puella mātrem,
- nec sēsē ā gremiō illius movēbat,
- sed circumsiliēns modo hūc modo illūc
- ad sōlam dominam ūsque pīpiābat.
- quī nunc it per iter tenebricōsum
- illūc, unde negant redīre quemquam.
- at vōbīs male sit, malae tenebrae
- Orcī, quae omnia bella dēvorātis:
- tam bellum mihi passerem abstulistis.
- ō factum male! ō miselle passer!
- tuā nunc operā meae puellae
- flendō turgidulī rubent ocellī.
Original draft written by Robert Amstutz