Aenēās et comitēs ā Carthāgine ad Italiam nāvigāvērunt. Trōiānī lītus prope Cumās vīdērunt et erant laetī. ad lītus advēnērunt et celeriter Aenēās templum Apollinis quaesīvit. pater Anchīsēs ōlim dīxerat, "necesse erit tibi invenīre templum Apollinis prope Cumās. pete Sibyllam!"

Aenēās templum Apollinis invēnit et Sibyllam salūtāvit. Sibylla iussit Aenēam Apollinī ōrāre. Aenēās Apollinem ōrāvit et rogāvit, "Apollō, deus maxime, dā Trōiānīs in Italiā habitāre. ōrō tē!"

Sibylla respondit, "Apollō tē audit sed necesse est tibi pugnāre in novō bellō magnō. Iūnō Trōiānōs nōn amat et necesse est tibi pugnāre cum hērōe fortiōre quam Achillēs."

Aenēās erat trīstis sed tum rogāvit, "possumne īre ad rēgnum Plūtōnis? volō patrem meum iterum vidēre. est mortuus sed eum vidēre dēsīderō."

Sibylla respondit, "ita vērō, sed necesse est tibi tenēre rāmum aureum. ī ad silvam et invenī rāmum aureum. Charōn rāmum aureum poscit!"

Aenēās ad silvam ambulāvit et diū rāmum quaerēbat sed nōn invēnit. Aenēās dēspērābat et signum ā deīs ōrābat. subitō duae avēs prope Aenēam volābant et eum ad arborem dūcēbant. in arbore rāmum aureum Aenēās invēnit. Aenēās rāmum cēpit et ad Sibyllam rediit.

Sibylla rāmum spectāvit et tandem "tempus," inquit, "est īre ad portam Plūtōnis. venī. dūcam tē."

cum Sibyllā Aenēās ad portam Plūtōnis iit et tum per portam Plūtōnis ambulāvit. per portam Aenēās flūmen Acheruntem vidēre poterat. Charōn aderat et umbrās multās trāns flūmen portābat. inter umbrās Aenēās amīcum suum vīdit. amīcus erat Palinūrus, vir quī nāvēs Trōiānōrum regēbat. Palinūrus tamen in mare ē nāve cecidit et nunc mortuus erat.

Aenēās rogāvit, "Sibylla, cūr Palinūrus adest? cūr flūmen nōn trānsiit?"

Sibylla respondit, "corpus Palinūrī in terrā nōn est. Palinūrus pecūniam nōn habet. Charōn pecūniam poscit."

Aenēās erat trīstis sed ad Charontem ambulāvit. Charōn dīxit, "homō quī vīvit nōn potest trānsīre flūmen!"

Aenēās rāmum aureum Charontī dedit. Charōn rāmum cēpit et Aenēās parvam nāvem intrāvit. Charōn trāns flūmen Aenēam portāvit. Aenēās vōcēs trīstēs mortuōrum audiēbat et erat territus!