P. Vergilius Maro, Aeneid 1.81-101
Tier 2
Aeolus haec verba dīxit. ille tunc terminale hastae montem in latus pulsat. ventī ruunt et perflant terrās turbine. incubuērunt marī et omnēs ventī (Eurus, Notusque Āfricusque) per tōtum mare ruunt et vāstōs flūctūs ad lītora volvunt.
clāmor virōrum et strīdor rudentum īnsequitur; et subitō nūbēs ēripiunt caelum diemque ex oculīs Troiānōrum; ātra nox tegit mare. caelum intonuit et micat ignibus. omnia intentant mortem virīs.
statim membra Aenēae solvuntur. ingemit et tendēns manūs ad sīdera, dicit, “illī sunt felicēs quī interfectī erant ante ōra patrum sub altīs murīs Trōiae! ō Diomedēs, volō mē potuisse occumbere in campīs Trōiānīs et effundere hanc animam tūā dextrā, ubi saevus Hector iacet tēlō Achilleī, ubi ingēns Sarpēdōn iacet, ubi rīvus Simoīs cēpit et volvit tot scūta virōrum et galeās et fortia corpora.”
Tier 3
haec ubi dicta (sunt), (Aeolus) impulit cavum montem in latus cuspide conversā: ac ventī, sicut agmine factō, quā porta data, ruunt et perflant terrās turbine. incubuērunt marī, et ā sēdibus īmīs Eurus Notusque Āfricusque, crēber procellīs, ruunt ūnā totum (mare) et volvunt vāstōs flūctūs ad lītora.
clāmor virōrum et strīdor rudentum īnsequitur; et subitō nūbēs ēripiunt caelum diemque ex oculīs Teucrōrum; ātra nox incubat pontō. polī intonuērunt et aethēr micat crēbrīs ignibus, et omnia intentant praesentem mortem virīs.
extemplō membra Aenēae solvuntur frīgore: ingemit, et tendēns duplicēs palmās ad sīdera, refert tālia vōce: “ō terque quaterque beātī, quīs contigit oppetere ante ōra patrum sub altīs moenibus Trōiae! ō fortissime gentis Danaüm, Tȳdīdē! mēne nōn potuisse occumbere campīs Īliacīs, et effundere hanc animam tuā dextrā, ubi saevus Hector iacet tēlō Aecidae, ubi ingēns Sarpēdōn iacet, ubi Simoīs volvit tot correpta scūta virōrum et galeās et fortia corpora?”
Tier 4: Grammatica
- haec ubi dicta, cavum conversā cuspide montem
- impulit in latus: ac ventī, velut agmine factō,
- quā data porta, ruunt et terrās turbine perflant.
- incubuēre marī, tōtumque ā sēdibus īmīs
- ūnā Eurusque Notusque ruunt crēberque procellīs
- Āfricus, et vāstōs volvunt ad lītora flūctūs.
- īnsequitur clāmorque virum strīdorque rudentum;
- ēripiunt subitō nūbēs caelumque diemque
- Teucrōrum ex oculīs; pontō nox incubat ātra.
- intonuēre polī et crēbrīs micat ignibus aethēr,
- praesentemque virīs intentant omnia mortem.
- extemplō Aenēae solvuntur frīgore membra:
- ingemit, et duplicēs tendēns ad sīdera palmās,
- tālia vōce refert: 'ō terque quaterque beātī,
- quīs ante ōra patrum Trōiae sub moenibus altīs
- contigit oppetere! ō Danaüm fortissime gentis
- Tȳdīdē! Mēne Īliacīs occumbere campīs
- nōn potuisse, tuāque animam hanc effundere dextrā,
- saevus ubi Aeacidae tēlō iacet Hector, ubi ingēns
- Sarpēdōn, ubi tot Simoīs correpta sub undīs
- scūta virum galeāsque et fortia corpora volvit?'
Tier 4
- haec ubi dicta, cavum conversā cuspide montem
- impulit in latus: ac ventī, velut agmine factō,
- quā data porta, ruunt et terrās turbine perflant.
- incubuēre marī, tōtumque ā sēdibus īmīs
- ūnā Eurusque Notusque ruunt crēberque procellīs
- Āfricus, et vāstōs volvunt ad lītora flūctūs.
- īnsequitur clāmorque virum strīdorque rudentum;
- ēripiunt subitō nūbēs caelumque diemque
- Teucrōrum ex oculīs; pontō nox incubat ātra.
- intonuēre polī et crēbrīs micat ignibus aethēr,
- praesentemque virīs intentant omnia mortem.
- extemplō Aenēae solvuntur frīgore membra:
- ingemit, et duplicēs tendēns ad sīdera palmās,
- tālia vōce refert: 'ō terque quaterque beātī,
- quīs ante ōra patrum Trōiae sub moenibus altīs
- contigit oppetere! ō Danaüm fortissime gentis
- Tȳdīdē! Mēne Īliacīs occumbere campīs
- nōn potuisse, tuāque animam hanc effundere dextrā,
- saevus ubi Aeacidae tēlō iacet Hector, ubi ingēns
- Sarpēdōn, ubi tot Simoīs correpta sub undīs
- scūta virum galeāsque et fortia corpora volvit?'